路易斯威爾封王 漢確克成首位後備MOP

為兄弟而戰，路易斯威爾大學時隔27年再奪NCAA冠軍感動人心！昨日舉行的NCAA決賽，路易斯威爾憑後備奇兵漢確克（Luke Hancock）大發神威攻入22分，以82:76勇挫密歇根大學，奪得創校史上第3個NCAA全美錦標，「斷腳男」奇雲韋爾（Kevin Ware）臨完場更攬住老竇爆喊，感激一班好兄弟「打埋佢嗰份」助其圓夢！

主帥皮蒂諾四喜臨門

賽事頭號種子路易斯威爾縱然一度落後12分，但就藉漢確克喪入5個3分波貢獻全隊最高的22分，帶領球隊以6分之差贏波，自1986年後再次奪得NCAA冠軍之餘，自己亦成為史上首位奪得MOP（最傑出球員獎）的後備球員。9日前於8強戰恐怖斷腳的奇雲韋爾，未完場已經攬住老竇爆喊，大會亦特意安排球場職員校低籃框，讓撐着拐杖的奇雲韋爾剪低籃網留念。

賽後奇雲韋爾激動表示：「所有隊友都係我嘅好兄弟，佢哋承諾為我而戰，呢個Happy Ending將會畢生難忘！」

至於路易斯威爾主帥皮蒂諾（Rick Pitino）則屬最大贏家，這位NCAA史上首位帶領兩支不同隊伍奪冠的教頭，其愛駒Goldencents兩日前贏馬獲得肯塔基打吡大賽參賽資格、囝囝Richard又榮升為明尼蘇達大學教練，昨日他更聯同佩頓（Gary Payton）等名宿入選2013年名人堂，可謂四喜臨門！