馬刺撼熱火唔出真路比利
熱火、馬刺爆發聯盟一哥大戰！去年馬刺主帥普波維治（Gregg Popovich）派副選鬥熱火鬧到滿城風雨，「輪休門」事件更遭球迷告上法庭，雖然起訴已經於昨晨獲撤銷，不過普波維治依然「唔識死」，預告聽朝對熱火的「冠軍前哨戰」收起真路比利（Manu Ginobili），莫非密謀在愚人節再玩聯盟及球迷一鋪？
抗議地獄賽程
馬刺教練普波維治向來天不怕地不怕，去年11月尾就因為不滿聯盟賽程安排，趁全美直播的「熱刺大戰」收起三巨頭，連累球會被聯盟罰款25萬美元並被1位球迷兼律師入稟控告欺詐。據《今日美國》昨晨報道，雖然該位叫麥古尼斯的律師已經撤銷起訴，但普波維治仍「見過鬼唔怕黑」，決定繼續「玩嘢」！
這支西岸榜首隊伍昨日靠鄧肯（Tim Duncan）絕殺得手，主場104:102險勝快艇（右圖），普波維治賽後稱真路比利腿筋有傷，肯定不會於明早鬥熱火一戰披甲。鑑於馬刺未來10日內要硬撼灰熊、雷霆及金塊，引發美媒揣測普波維治極可能又因為對賽程安排不滿，趁愚人節「做嘢」抗議。
熱火提早獲東岸冠軍
反觀熱火就鬥志十足，雖然27連勝走勢宣布斷纜，但昨日依然輕鬆以108:89大炒主隊黃蜂，提前10輪常規賽鎖定東岸冠軍，加上首循環面對馬刺副選兵僅贏5分，明早為面子兼做聯盟「一哥」爭取季後賽主場優勢必拚，作客受讓馬刺1.5分捧下盤。（廣東體育周一早上7:00直播）
熱火下半季勢不可擋，同屬東岸的塞爾特人為免在次輪季後賽硬撼該支衞冕隊伍，盛傳餘下賽事會「勒住打」，寧願穩守6、7位亦不願意爭4、5位，難怪教練李華士（Doc Rivers）近日已收起主將加納特（Kevin Garnett），明日預料會任由主場出擊的紐約人魚肉。（now678台周一早上7:30直播）
