占士屠龍落吧歎超級碗見證烏鴉登基High爆

第47屆超級碗昨日舉行，身為美式足球狂迷的勒邦占士（LeBron James）本來冇得睇嘈到拆天，不過熱火會方就相當識做，昨晨安排一班手足留守多倫多睇埋場超級碗先返歸，氹到「大帝」笑逐顏開。加上熱火作客100:85擊敗速龍，成功將史普斯達（Erik Spoelstra）捧做東岸明星隊主帥，興奮程度與巴爾的摩烏鴉捧超級碗有得揮！

由於熱火今早要於主場恭候山貓，所以昨晨與速龍交手後，理應直接飛返邁阿密休息。鑑於占士抱怨回程期間會錯過超級碗賽事，連日來一直「牙痛咁聲」，會方為「冧番」這位王牌球星特別更改行程，戰罷速龍後即拉大隊到多倫多著名體育酒吧Real Sports，滿足一眾球員的睇波欲。

據悉，這間鄰近加拿大航空中心的酒吧乃楓葉體育及娛樂集團所擁有，即速龍老闆泰倫巴姆（Larry Tanenbaum）旗下物業，連對家都要擦占士鞋，難怪「大帝」心情大靚，一到埗就捧起安放於酒吧的加拿大式足球冠軍獎盃影相，十足大細路。

占士「失而復得」自然高興，昨晨更大發神威攻入全場最高的30分，帶領熱火以15分之差屠「龍」，他表示：「贏波好高興，最重要係可以帶住靚靚心情欣賞超級碗！」隨住熱火贏波力壓紐約人成為東岸「一哥」，帶挈主帥史普斯達首次獲選為東岸明星隊教頭，史帥更暗示會由保殊（Chris Bosh）取替提早收咧的朗度（Rajon Rondo）躋身東岸明星隊正選，意味熱火將會繼1990年的湖人後，再一次有3位球員同時出現於明星賽正選陣容！