韋迪 保殊跟特種兵教頭習武

熱火雙巨頭習武爭標！近年不少NBA球員都加入瑜伽及普拉堤行列，務求加強身體柔軟度避免受傷，韋迪及保殊就決定帶起潮流，今季出重金拜師海豹突擊隊教練習武，實行拍住上「打」天下！

據美媒《RealGM》報道，原來韋迪及保殊早於季前就開始「食夜粥」，拜師邁阿密著名健身店TERF創辦人達斯習武，這位全美武術名人堂得主曾擔任美國海豹突擊隊教練，今次就以訓練軍人的方式喪操兩位熱火球星，並從速度、協調、反應、靈活性、力量及平衡總共6方面着手。

新季個人數據上升

近年傷患頻頻的「閃電俠」新季只缺陣4場，保殊的投射命中率（55.5%）及封阻（1.5次）數據皆屬職業生涯新高，證明習武成效相當顯著。兩位徒弟都脫胎換骨，師父達斯自然收貨：「其實武術同籃球好似，打波成日會畀人撞跌，我唔係教佢哋打架，而係教佢哋點樣仆落地去卸力保護自己。保殊今季改打中鋒，佢嘅體格冇可能操到260磅，但我有方法令佢好似260磅咁壯，同時又夠靈活。」

另據《邁阿密先驅報》透露，衞冕冠軍熱火將於本月29日造訪白宮，獲美國總統奧巴馬接見。至於恨攞生涯第6隻冠軍指環恨到發燒的高比拜仁，昨日就攻入23分率領湖人主場以113:93大勝騎士終止6連敗頹勢，明撼公鹿只讓3.5分有望再下一城，捧上盤。（now678台及中央5台周三早上11:30直播）