積遜教練巨鑽求婚 「1314」做湖人女婿

「禪師」即將加入湖人大家庭！昨日是2013•1•4，國語諧音就是「愛你一生一世」，遠在美國的積遜教練亦Sweet到震，被踢爆出動巨型鑽戒求婚成功，將會與湖人班主謝利巴斯的女兒珍妮巴斯結束12年愛情長跑！消息指「禪師」結束寡佬生涯後，未來幾日將會與籃網傾加盟條件，有望出山重執教鞭。

現年67歲的積遜與比自己年幼16載的珍妮巴斯自2001年行埋，雖然珍妮曾經在自傳表示不會與「禪師」結婚，只想維持同居關係，不過這位湖人副行政總裁昨日突然「晒命」，透過twitter自爆終於嫁得出：「真係好開心，我本來唔想將呢單嘢搬出嚟講，但好多twitter朋友都想知咩事，其實我喺聖誕節已經收到呢隻戒指。」

珍妮巴斯同時向《ESPN》表示，二人尚未決定結婚日期，並坦言不介意積遜執教湖人以外的球隊。「禪師」快將加入湖人大家庭，雖然早前因叫價太高令準外父謝利巴斯卻步，不過暫由卡利斯莫領軍的籃網，就表示會不惜一切邀請「禪師」出山。消息指籃網老闆普羅霍羅夫放完新年假之後，本周內會晤積遜並出動銀彈政策邀請前者加盟，「禪師」2013年絕對事業、愛情兩得意。