「保險Paul」睇得打得
基斯保羅有個孖生兄弟？無錯，但只是在廣告世界！最近美國保險公司State Farm度到條靚橋，由CP3一人分飾兩角拍攝新廣告，其中前者的「保險Paul」角色大獲好評，鬍鬚Look造型更加熱爆NBA，就連隊友、球迷及講波佬都齊齊黐假鬚力撐。快艇在一片「鬍」風吹襲下亦愈戰愈勇，昨以116:114反勝爵士連贏16場！
新一輯State Farm廣告以《Born to assist》作主題，講述基斯保羅有個失散多年的孖生兄弟Cliff Paul，兩兄弟一個打波，一個Sell保險，職業看似「大纜扯唔埋」，不過二人都分別為隊友及無數家庭提供協助（Assist），勁有諗頭，但講到最爆，肯定非Cliff Paul的鬍鬚Look造型莫屬！
隊友影星齊黐假鬚
State Farm眼見「保險Paul」人氣急升，特別為這個廣告人物開設twitter帳號，短短幾日就有接近4,000「跟隨者」。快艇更加食住條水，前日向Fans免費派發假鬚，就連隊友格芬、評述員米拿及影星比利基斯度都齊齊化身「保險Paul」，「鬍」風熱潮比「大鬍子」占士夏登有過之而無不及。
「保險Paul」場外Hit爆，「真Paul」場內亦Fit爆，昨日就貢獻29分及6次助攻，帶領一度落後19分的快艇以2分之差反勝主隊爵士，刷新創會以來最長的16連勝紀錄。雙方明早易地再戰，贏到開巷的快艇當然秤先，主場讓到9.5分照撐上盤。
基斯保羅（左）場內場外都一樣咁搶鏡。（美聯社圖片）
