艾榮「一王兩后」偷食斷正

聖誕佳節，普天同慶，之不過艾榮女友就唔慌唔o架嘞！呢位騎士球星尋日趁女友返鄉下度假作反，左擁右抱歡度火辣辣聖誕，本來就神不知鬼不覺，奈何兩位辣妹就「過佢一戙」，將一張「一王兩后」相掟上網，驚動艾榮身處巴西嘅女友Natalia Garibotto，睇怕佢今鋪水洗都唔清！

尋日係美國時間聖誕節，NBA安排咗5場重頭戲搶收視，估唔到冇波打嘅騎士控衞艾榮先係主角！昨晨一張艾榮攬女相喺互聯網瘋傳，從照片所見，呢位2011年狀元受到猛烈「胸襲」，下體亦遭受「夾擊」，最離奇係呢張相竟然係由艾榮個twitter發布，真係講都冇人信。

艾榮twitter發布 刪相補鑊

據美媒《Inflexwetrust》爆料，圖中黑衫索女係呢單嘢嘅幕後黑手，就係佢當晚搶咗艾榮部手機靜靜雞「鋪相」。艾榮知道賴嘢之後騰晒雞，極速剷咗張相之餘，又喺短短一個鐘頭內狂發留言「耍冧」，仲稱呼女友Natalia係老婆，擺明身有屎！艾榮表示：「張相唔係我『鋪』，對唔住咁多位Fans……我點會上載啲咁嘅相？我有老婆o架，真係黐線！」

女友回應：有人博出位

美國八卦媒體大肆報道，唔少討論區亦都議論紛紛，身處家鄉巴西放聖誕假嘅Natalia點會收唔到風吖？佢好快就透過twitter回應事件，表示「有人想搞事博出位」，但就冇講過信唔信艾榮之類嘅嘢，艾榮個衰佬今次斷到正一正，唔頂番幾晚痰罐睇怕難洩女友心頭之恨。司職控衞嘅艾榮場內場外都咁多「失誤」，下次偷食記住小心啲啦！