籃壇「腦殘」拜林搞喎76人重組

籃壇「腦殘」玩死76人!東岸新貴76人今夏着手搞重組,偏偏就信錯人揀中拜林做重建基石,這位大前鋒繼碌齡加劇膝部傷勢鬧出大笑話後,昨日又被踢爆3年前曾違規玩笨豬跳,有著名骨科醫生更斷定拜林肯定提早收咧,1,650萬美元(約1.27億港元)年薪猶如掟落大海,76人都算戇居!

76人今夏送走王牌球星伊古達拿,然後從湖人簽入全明星中鋒拜林,奈何這位25歲球員因膝傷問題仍未為新東家披甲,會方亦第3度推遲拜林的復出日期,昨晨更有消息指拜林今季已經Game Over。

澳門玩笨豬跳唔申報

1位國際著名骨科醫生向《特拉華州新聞報》提供大量醫學文獻,斷定拜林會提早收咧,並表示:「我冇參與過拜林嘅膝部治療,亦都冇睇過佢嘅磁力共振檢查報告,不過照我經驗睇,拜林好可能係膝部軟骨挫傷,採取非手術治療要4至6個月康復期,做手術嘅話今季可以報銷。」

拜林最近碌齡加劇膝部傷患淪為笑柄,有球迷更改圖狂玩這位籃壇「腦殘」,另據《The Score》昨日爆料,原來拜林曾於09年到澳門觀光塔玩笨豬跳,根據聯盟規定,但凡進行滑雪、跳降落傘及笨豬跳等高危運動都要向NBA申報,拜林偷雞玩命隨時遭秋後算帳。

美媒《CBSPhilly》收到告密短訊,有前湖人球員指拜林對籃球的熱愛程度不足,《Insidehoops》網民更指前者職業操守有問題,最慘是76人以天價合約簽入拜林得個吉 ,嚴重影響組軍及戰鬥力,昨早造訪有艾榮倦勤的騎士都要輸83:92,76人今鋪真係多得拜林唔少!