我認輸但我好Enjoy
「做運動員可以退賽，做阿媽就唔得，所以呢場比賽你永遠冇得贏！」人人都知李麗珊好勝，「風之后」字典裏從沒「認輸」兩個字，然而近8年「奴隸獸」湊女生涯讓她深切體會「付出不等於勝利」，相識逾廿載，第一次聽見這位「鐵娘子」親口講「輸硬」，感覺難以置信卻又如此真實！為給予兩個寶貝女最好的教育和成長環境，「珊珊」近年不斷增值，「咪」樂譜、學朗誦、追科技……「全能媽媽」縱使承認「仲未識教女」，卻還是每天盡心盡力彈出悅耳的「湊女樂與怒」：「做阿媽比做運動員難一百萬倍，但我好Enjoy！」
”老公係娛樂組，我負責教育組。”
記：珊珊，成年冇見，兩個女幾大喇？讀緊幾年級？
珊：大女希皚7歲，今年小二，細妹嘉怡5歲，都K3喇，出年升小學，又要煩餐飽。
記：你同老公阿Sam喺教女方面嘅角色點樣分配？
珊：我兩公婆湊女一人一瓣，我係「教育組」，佢係「娛樂組」；「娛樂組」想用好多時間去娛樂，但「教育組」話佢聽，要向現實低頭。細女還可以，大女真係唔得，點都要讀書為先。
記：好典型嘅「嚴媽慈父」喎！
珊：都可以咁講。阿Sam EQ高，形象夠Nice，但惡起嚟好得人驚、冇情講；佢最擔心我谷壞，所以見到我嗌晒救命鬧女，啲女都唔聽話，就會好嬲；其實兩個女驚阿爸多過驚我，阿媽幾嬲幾惡，最後都係錫番你、攬番你，無計！
”未識Handle，做阿媽學無止境。”
記：湊女生活令你最大改變係乜？
珊：不斷Upgrade自己，因應個女需要而改變。好似買電話、電腦，以前好Personal，依家出發點係為個女，想買部可以做網上功課嘅電腦，一定Search足資料，咩機種、行咩嘢（OS）全部要識，更重要係計埋買得值唔值，依家始終係個家庭主婦，要睇住頭家，唔可以好似以前未結婚嗰陣咁，（啲錢）用晒咪算囉！就算買個Printer我都唔會求其，久而久之，喺呢個過程入面我學到好多知識，唔會同社會脫節，如果唔係就變師奶，齋講電視有咩節目，呢啲唔係我想要嘅人生。
記：除咗科技資訊，仲為個女學咗咩嘢？
珊：對我嚟講，比較新嘅挑戰係小提琴，我未至於拉埋一份，但學識咗睇「豆豉」（樂譜），平日陪個女練琴，都知佢有冇拉錯。我以前有冇興趣？咪玩啦！不過依家唔同晒喇，自己當係一種娛樂，OK嘅！另外，仲會同佢一齊去學中、英文、朗誦、羽毛球……其實我做嘅一切，既可以學嘢、教女、親子，又得到兩個女信任，賺晒！
記：做咗阿媽7年幾，你覺得自己識得教女未？
珊：我自問係個好負責任嘅阿媽，但老實講，到依家都未識Handle。我份人好火爆，成日忍唔到，鬧囉，結果搞到大家唔開心……我知咁樣唔Work，但暫時又未諗到最好嘅方法，就好似不停挑戰佢嘅容忍度，亦考驗緊我自己，「做阿媽」呢樣嘢真係學無止境。
記：你係咪用咗訓練運動員嘅方法教小朋友？
珊：應該話用運動員心態去教女。我理念係只要自理能力高，其他方面就會隨之而行；好簡單，連自己都搞唔掂，點去學嘢？我接受唔到一個人唔集中精神，Organize能力差，阿Sam可以忍，畀機會佢錯，但我唔得，因為我係運動員性格，唔能夠畀自己錯。
小朋友係白紙，你要幫佢畫嘢。”
記：作為「嚴媽」，現階段係咪乜都你話事？去到幾時先會「放手」？
珊：我都好想母女可以好似朋友咁傾偈，但依家唔得住，小朋友仲細，係一張白紙，你要幫佢畫嘢，Set好一個模範，講真，個女讀到中一已經唔受你控制啦！
記：你屬於「望女成龍」一族嗎？
珊：絕對唔係！我會教好佢中、英文，供埋讀大學，呢個係我責任，至於個女長大後想行咩路，我兩老唔會阻止，就算佢話要從事藝術（大家都知香港哋搞藝術搵唔到食），我都唔反對，總之唔好殺人放火就OK。我唔係你哋所諗「自己強，就要個女都強」，只係想喺佢仲細，控制到嘅時候盡量幫佢。
記：有冇發現兩個女有做運動員嘅天分？
珊：家姐性格唔似係運動員，反而阿妹有機會，佢係要好強嘅人（似足我），好似去朗誦咁，講完就走嚟問我幾時去攞獎，自信到爆！
記：做阿媽係咪難過做運動員？
珊：難一百萬倍！同埋你永遠冇得贏，運動員會知道點樣做就有機會（贏），但做阿媽永遠贏唔到，因為呢種係親情，就算仔女幾差，始終係自己骨肉，點都唔會衰到劈炮唔理佢。做運動員可以退賽，做阿媽就唔得，仲要成世冇得抖……養兒一百歲，長憂九十九！
「風之媽」Timetable
6:20am 起床
7:15am 送大女返學
8:15am 送細女返學
9:00am 返屋企、私人時間
2:00pm 接細女放學
2:30pm 指導細女做功課及溫書
3:30pm 接大女放學
4:00pm 指導大女做功課及溫書、或帶囡囡參與活動
7:30pm 晚飯
8:30pm 囡囡輕鬆時間（講故事或睇電視）
10:00pm 女兒睡覺
11:00pm 珊珊睡覺
「做運動員可以退賽，做阿媽就唔得，所以呢場比賽你永遠冇得贏！」
教囡囡做功課係每日指定動作。
私人時間
送返學
接放學