全能嚴媽甜酸苦辣

自05年誕下大女黃希皚，「珊珊」便捨帆而去，專心一意轉做全職家庭主婦，當了「風之媽」接近8年，嘗遍甜、酸、苦、辣；細心一想，以下3件事令她最難忘。

最痛苦‧打完女一齊喊

「有次大女又唔記得帶功課，我嬲到爆炸……一個禮拜冇帶幾次，真係火滾，打囉，雖然唔捨得用藤條打，但用手打都打得幾甘，打完之後個心痛到呢，個心好唔舒服，嗰晚勁唔開心，但阿女仲要我陪佢瞓覺，以為佢瞓着，我就攬住佢喊，點知畀佢聽到，結果兩母女一齊喊。其實打女試過好多次，但呢次最狠、最難忘、最痛苦。」

最自豪‧搞親子生日會

「兩年前大女快升小一，幼稚園同學各散東西，所以喺長洲組織個Party畀佢，當日有個阿媽陪囝囝玩獨木舟嗰陣好感動，之後多謝我哋畀個機會佢兩母子有個親子活動，其他家長反應都好熱烈。雖然搞Party超辛苦，但好值得，兩個女學會自立，照顧人，訓練到組織力。能夠Create呢個活動，我引以為傲o架！所以每年都期待暑假幫兩個女搞生日會。」

最窩心‧初次收信冧爆

「最窩心係第一次收到阿女寫畀我封信！其實好多小朋友都會畫畫送畀阿媽，佢兩個都試過，但細女啱啱升上K3嘅時候，就用英文寫咗封信畀我，話自己好愛媽咪，當然文法、串字有啲甩漏，但我真係喜出望外，個心仲好鬼Sweet添！」