雷阿倫發火砌低綠軍

阿媽被侮辱、昔日戰友當透明,占士及雷阿倫唔嬲就假!這對熱火雙星昨日齊齊化悲憤為力量合力轟入45分,帶領熱火主場以120:107砌低塞爾特人,於NBA開鑼日打響衞冕頭炮。

「占媽」哥莉亞一直被指與小牛後衞韋斯有路,塞爾特人球迷好玩唔玩,竟然設計一件印有「LEBRON WENT SOUTH BUT HIS MOM RIDES WEST(勒邦到南部打波但母親就與韋斯做愛)」字樣的Tee挑釁「大帝」。幸好開波前聯盟於美航中心進行頒獎儀式,壓軸登場的占士獲頒發冠軍指環時先識笑番。

綠軍球迷寸占士阿媽

至於新加盟熱火的雷阿倫,首節入替後隨即到「綠軍」後備席與教練李華士等擁抱,但「化友為敵」的加納特就當前者透明,令「雷神」勁冇癮。占士及雷阿倫屈埋成肚火當然要發洩,其中占士多次拆你屋都贏盡掌聲,全場貢獻26分及10個籃板,雷阿倫亦有19分進帳,熱火終以13分之差擊敗「綠軍」旗開得勝。

另外,颶風珊迪吹襲東岸,今季搬竇布魯克林的籃網昨因訓練場停電影響操練,不過聯盟昨日發聲明指該隊明早鬥紐約人的「紐約打吡」將如期舉行(now635台周五早上7:00直播)。至於馬刺主場對雷霆,客軍有占士夏登離隊,馬刺小讓2.5分宜捧「上盤」。(廣東體育周五早上9:30直播)

周三戰果

騎士 94:84 巫師

熱火 120:107 塞爾特人

湖人 91:99 小牛

前者主場;賽果僅供參考

雷阿倫(左)同舊隊友皮雅斯短兵相接。(美聯社圖片)

韋迪(左)同占士望住隻冠軍指環笑到四萬咁口。(美聯社圖片)