洛城爭食尾胡

好爸爸、大細路洛城尋夢!拿殊及格蘭希爾這對老拍檔今夏拆Band,分道揚鑣轉投洛杉磯雙雄,38歲的拿殊為仔女甘願得罪太陽Fans,40歲的格蘭希爾就唔認老拒絕言退,雖然雙方新季會由隊友變成競爭對手,但卻抱着一個共同目標,爭取在職業生涯尾段,實現首奪冠軍指環夢想!

近8季都効力太陽的拿殊今夏毅然離隊,明明獲速龍及紐約人等多間球會招手,偏偏這位兩屆常規賽MVP得主就轉投太陽死敵湖人,激到鳳凰城球迷紮紮跳,但站在爸爸立場,拿殊的解釋絕對合理,他說:「紐約太嘈唔啱我,況且洛杉磯離我屋企好近,1個月至少可以返3次屋企,你話如果聖誕節陪唔到班小朋友係幾慘。」

希爾登報謝球迷

與拿殊不同,縱使格蘭希爾轉投快艇未有辣着Fans,但依然在《亞利桑那共和報》落全版廣告答謝太陽球迷,勁識做!拒絕老友拿殊好意,選擇過檔快艇,「魔鬼山」稱:「快艇球員更加年輕,我鍾意黐住後生仔玩,同佢哋打波會令我忘記實際年齡,延長青春期,哈!」

征戰NBA18個球季總共因傷缺席了479場常規賽、即接近6個球季,格蘭希爾以「遺憾」來形容其職業生涯:「我希望補償以往嘅缺陣時間,所以40歲人都仲打緊波,我熱愛籃球同比賽,好希望今季可以攞到總冠軍!」

拿殊圓夢有難度

拿殊及希爾一把年紀依然保養得宜實屬難得,拿殊自爆每日都堅持練波,並踢足球減壓,這樣有助延長職業生涯。這位加拿大控衞今季加盟湖人,與高比拜仁、杜域侯活及加素組成新F4,收視肯定贏到盡,之不過季前賽8連敗已大概反映出主帥米克布朗的戰術「唔多掂」,拿殊想爭生涯首隻指環,睇怕仍要等等。