熱火懷舊招式衞冕 占士練成天勾絕技
熱火三巨頭復古爭衞冕！勒邦占士去年夏天拜師奧拉祖雲學掂「夢幻步」，結果即刻收穫職業生涯首隻冠軍指環。復古球技使得，「大帝」季前食過翻尋味學埋渣巴的招牌「天勾」，加上韋迪及保殊亦自爆喪偷卡素爾及奧拉祖雲師，三巨頭懷舊抗敵，有望於整體戰鬥力大跌Watt的東岸蝦蝦霸霸。
占士去季向「夢中人」交學費，進步神速的低位步法及背籃功大家有目共睹，適逢熱火助教麥卡度曾於球員時代與渣巴並肩作戰，並獲得對方的「天勾」真傳，「大帝」今夏當然捉實這位1975年MVP得主唔放啦！打從今夏的訓練營開始，占士幾乎在每課操練後都獨自加操半粒鐘練勾手，進度令麥卡度大吃一驚：「『天勾』講求步法、出手點同手感柔軟度，占士嘅彈跳力、體格同速度都比渣巴強，呢招隨時用得比渣巴更出色。」
韋迪學卡素爾 保殊學夢幻步
另外兩巨頭亦有鋪復古癮，當中出身芝加哥的韋迪就自爆學習對象並非米高佐敦，而是卡素爾。「閃電俠」稱：「當時我喺密爾沃基返學，効力公鹿嘅卡素爾係我嘅模仿對象，佢帶波嗰時懶洋洋，但突如其來嘅Fing頭假動作次次都逢人過人，我梗係要學啦！」至於保殊就稱已經學掂奧拉祖雲的全套「夢幻步」，新季各位球迷記住（目及）實。
7成總經理睇好熱火冧莊
熱火三巨頭個個身懷絕技，唔怪得據早前NBA官方進行的調查顯示，有8成聯盟總經理都希望將「大帝」收歸旗下，7成票率睇好熱火成功衞冕總冠軍。查實熱火獲力捧冧莊不無道理，畢竟東岸競爭對手問題多多，公牛王牌戴歷羅斯復出無期、塞爾特人的加納特及皮雅斯年事已高、魔術又有杜域侯活離隊，簽入雷阿倫及劉易斯後令外線火力大增的熱火，有力稱霸東岸兼再捧總冠軍。
新秀狀元安東尼戴維斯（右）尋日喺季前賽打出身價，率領黃蜂擊敗熱火。（美聯社圖片）