樂雪凹凸配
香港羽壇近年新星湧現，土生土長的「90後」羽壇雙姝潘樂恩（阿潘）與謝影雪（阿雪），早前在日本超級賽揚威，為香港羽壇寫下歷史新一頁。雖然「樂雪」組合合作僅2年，性格又迥異，一個愛韓劇、一個愛鐵甲奇俠，然而就是這「一凹一凸」互補長短的配搭，成為她們衝向世界的「必殺技」！
阿潘與阿雪在09年以臨時拍檔身份出戰亞青，未夾過就殺入8強，隨即再戰世青賽，竟又成功踏上世青頒獎台，直至2年前試圖衝擊倫奧，他倆才接受有系統的專業訓練。雖然練波後各有節目，場外嗜好完全不同，但兩人卻甚有默契，被問到默契何來？阿潘、阿雪卻眼望眼「答唔出」。
阿潘煲韓劇 阿雪愛Iron Man
阿雪表示：「我鍾意睇戲，但佢唔鍾意，淨係煲韓劇，特別係情情塌塌，相反浪漫片唔啱我，唔好以為我好斯文，其實我好鍾意睇Iron Man、Avengers（復仇者聯盟）嗰類電影，我仲成日笑阿潘竟然唔知乜嘢係Iron Man。」不單止愛好不同，她們更試過因為發揮不佳發生爭執，阿潘說：「我哋試過冷戰，比完賽互不瞅睬。」那最長一次冷戰是多久？阿雪想了想說：「比賽輸了都要住同一間房，兩個人唔講嘢會口臭，真係唔記得，頂多一兩天，邊個啖氣快落就主動出聲先囉。」
經過時間的磨合，急躁的阿雪及慢熱的阿潘已能在場上互補不足，她們「一左一右」的握拍更成為其中一個優勢，阿雪亦承認彼此互相影響：「佢影響我好多，場內場外我都係一個好急嘅人，但佢會不時提我冷靜啲，打失波再嚟過，其實我依家仲係好衝動，希望可再改善。」
信心大增 目標2014亞運
她們場外最有「默契」的一次要數「整蠱黑妹」，提起如何整蠱師姐葉姵延，阿雪即手舞足蹈地說：「有一次阿潘喺黑妹部電腦整咗貞子做Wallpaper。」阿潘更搶着說：「間房又黑媽媽，嚇到佢（黑妹）大叫。」
「樂雪組合」未來將赴歐洲出戰連串賽事，入隊4年的阿潘稱：「我無想過真係可以攞（日本超級賽）冠軍，奪冠令我哋日後比賽信心大增。」對於未來目標，阿雪表示：「未來幾站超級賽我哋都想攞，但目標會放在2014年亞運會，希望可以攞到獎牌，世界賽如果入8強已好滿足。」
「樂雪」組合希望贏多幾個超級賽錦標。
