愛林丹夠Man王晨夠型

記：記者

潘：潘樂恩

雪：謝影雪

記：你哋點樣開始打羽毛球？

潘：有次警察會搞親子同樂日，有個Uncle教我打，我就鍾意咗，三年級第一次報訓練班。

雪：我媽每星期打兩、三次羽毛球，所以我好細個佢就推埋我去打波，跟住就跟佢哋打吓學吓。

記：講吓對方嘅優點同缺點？

潘：阿雪呀，心直口快，好唔好都講，缺點都係心直口快。至於喺球場內，佢打波主動，但性急。

雪：阿潘，場外活潑開朗，好多嘢講，最鍾意講爛gag。球場內比較被動、慢熱，但比我冷靜。

唔打波即做海豚狗仔訓練員

記：你哋有冇偶像呀？

潘：林丹。細個唔係好鍾意佢，覺得佢好寸，但上屆亞運決賽之後就開始欣賞佢，嗰場決賽勁好睇，佢亦成熟咗好多，覺得佢好型、好Man囉。

雪：Auntie Wong（王晨）。我覺得佢打波好型，勁有性格。我無諗過後來同佢一隊，記得有一次全英賽同佢一間房，超緊張，又怕嘈醒佢。佢其實好錫我哋，成日煲紅棗水畀我哋飲。

記：如果你哋唔打羽毛球，想做乜嘢？

潘：讀吓書囉！我想做海豚訓練員，我好鍾意海豚，但游水唔叻，唔知得唔得呢？

雪：做少奶，哈哈！我都想做狗仔訓練員，我好鍾意狗，屋企養咗兩隻松鼠狗，勁可愛。