熱火贏波贏造型

NBA球星不單球技出眾，更時刻走在潮流尖端，雷霆球星韋斯布克最近憑齋框眼鏡搶盡風頭，兩大熱火潮男「睇唔過眼」齊齊出招夾擊，先有韋迪潮「勝」對手，繼而勒邦占士更成功「解碼」雷霆，昨日率領熱火以100:96砌低該支西岸勁旅，總比數扳成1:1，贏完造型又贏波。

無鏡片眼鏡搭「花喱碌」Tee已成為韋斯布克的新標誌，這位雷霆控衞於Game2展開前自封為「齋框眼鏡鼻祖」，指其他球員只是跟風佩戴，結果遭「閃電俠」還擊：「齋框眼鏡興咗好耐啦，肯定唔係韋斯布克帶起呢個熱潮。潮流嘅嘢成日變，呢款眼鏡下季咪又會過時！」

占士刨書領悟致勝「密碼」

韋迪自爆父親昔日連揸貨櫃車時也穿着西裝褸，耳濡目染，所以自己對衣着亦十分講究，就連左手食指受傷都要揀選特定顏色指套襯波衫，昨日更以粉紅色窄褲造訪雷霆主場，潮Look獲名嘴巴克利喪讚，未開波已靠衣着鍊贏韋斯布克。

另一巨頭勒邦占士自躋身季後賽後便有鋪「刨書癮」，本輪系列賽就喪睇當紅饒舌天王Jay-Z的《Decoded（解碼）》，並似乎有所領悟，昨日一開波就帶領熱火打出一輪18:2攻勢，全場貢獻「32+8+5」，包括完場前7秒逼到杜蘭特射失關鍵一擊，兼且一班綠葉交足貨，最終熱火作客以4分之差贏波，終止雷霆季後賽主場9連勝走勢。

山貓斟夏登做大佬

總比數被追至1:1的雷霆，下周一將造訪邁阿密展開Game3，全場攻入32分的杜蘭特賽後躁爆，於發布會彈記者的問題「冇Point」兼爆粗離席。與此同時，美媒指雷霆薪酬空間有限，難以續簽即將成為自由身的占士夏登，魚腩部隊山貓昨日已計劃用榜眼籤交易該位「最佳第6人」，力捧夏登上位做山貓大佬。