新舊世代鬥法馬刺雷霆爭西岸盟主
NBA西岸決賽明早率先爆發，賽前外間均形容今場是新舊力量角力，當中雷霆「KD」杜蘭特昨日就率先擊倒馬刺鄧肯，暫居季後賽MVP排名之首，另邊廂最佳第6人占士夏登就將正面挑戰「影子」真路比利。究竟是雷霆青出於藍？還是馬刺薑愈老愈辣？答案即將揭盅！（now635台及中央5台周一早上8:30直播）
美國《ESPN》昨公布新一期季後賽MVP排行榜，雷霆球星杜蘭特，憑藉多次在關鍵時的出色發揮，力壓熱火的勒邦占士及馬刺的鄧肯暫登首位。
馬刺對杜蘭特投晒降
杜蘭特在今屆季後賽表現「着晒火」，馬刺眾將均表示對「KD」「投晒降」，「防守專家」史堤芬積遜向《聖安東尼奧快訊報》稱：「杜蘭特身高6呎11，咩位置都射得、速度又快，邊有可能完全守得住？頂多唔好成日畀佢喺『食胡位』出手；當佢出手，就盡可能伸長手臂去干擾；同時打得硬啲，多啲身體接觸等佢無咁輕鬆。」
至於臂展達2米2、綽號「新保雲」的李安納就更絕望：「我諗我可以做就係增加杜蘭特嘅出手難度，然後心入面祈禱唔好入。」
馬刺老將鄧肯今季返老還童，不過明日主場對雷霆，「石佛」坦言最害怕的不是杜蘭特，而是與他對位的伊巴卡：「伊巴卡堵塞防守漏洞勁到無倫，而且封波超勁，我一定會記住呢兩點，作出針對性部署。」
第六人影子對決
其實除了杜蘭特及鄧肯，雷霆的占士夏登及馬刺的真路比利這對新舊最佳第6人對碰亦是今場西岸決賽焦點所在，賽前真路比利表示非常期待這場「影子對決」：「占士夏登真係好似我，一樣係左手射波，又係打第6人；名義上係得分後衞，但一樣可以key波，跟影子打波一定好有趣。」占士夏登則明言無懼防守真路比利：「我哋啲特點好似，我留意到佢嘅移動同腳步好狡猾，我諗我應該知點樣防守佢。」
鄧肯（馬刺）
出賽次數：8場
出場分鐘：32分鐘
得分：17.6分
籃板：9個
助攻：2.9次
偷波：1次
封波：1.9個
效率值：26.36
杜蘭特（雷霆）
出賽次數：9場
出場分鐘：40.7分鐘
得分：26.7分
籃板：8.1個
助攻：3.4次
偷波：1.3次
封波：1.1個
效率值：26.56
