保殊贏波賀添龍B
由紐約到邁阿密再到紐約，熱火前鋒保殊於24小時內穿梭兩地，務求確保母子平安，與老婆Adrienne迎接新生命降臨，入完產房又趕回球場。昨日開波前半小時才到達麥迪遜廣場公園的保殊，協助熱火以87:70再挫紐約人，喜得貴子之餘總比數又領先到3:0，「龍王」可謂雙喜臨門！
熱火前日下午3時啟程前往紐約備戰Game3，大軍才剛登陸目的地，保殊就接獲老婆就快生的消息，於是立即搭私人飛機趕返邁阿密。直至昨晨3時，「龍B」終於「面世」。據《ESPN》報道，一家三口享受短暫天倫樂後，保殊又再花3小時飛赴紐約機場，由於當時交通擠塞，保殊幾經辛苦才於開波前半小時趕到麥迪遜廣場公園。
開波前半小時到場照打正選
據悉，保殊一踏入更衣室就獲全體熱火隊友熱烈歡迎，教練史普斯達更即時委任這位新任爸爸擔任正選，令陣營士氣大振。縱然於趕命24小時內左騰右騰，然而保殊依然出戰近37分鐘並貢獻9分及10個籃板，加上勒邦占士有32分進帳，最終帶挈熱火以17分之差大炒紐約人。
賽後勒邦占士上載一張「恐龍仔」照到twitter恭賀「小保殊」出世，隊友柏堤亞則以昨仗的比賽用球作為「龍B」的出生禮物，升格做老竇的保殊興奮表示：「今日非常忙碌，但絕對係人生當中最幸福嘅一日！我老婆生完之後就叫我快啲歸隊，知道佢同BB都會喺醫院睇呢場直播，係我充滿力量嘅主要原因。」
紐約人扯白旗唔出林瘋
熱火喜事重重，反觀總比數落後到0:3的紐約人，已經跨季連輸13場季後賽創造聯盟最差紀錄，更令球迷失望的，就是林書豪隨時要等到來季才復出，前日練過三對三對抗後，J.Lin昨日自爆：「左膝再次酸痛，Game4應該打唔到，Game5？我都唔知。」
翻查歷史，季後賽史上總共出現過99次0:3戰果，當中未試過有球隊能反勝晉級，盛傳紐約人已扯白旗，故不會冒險逼「林瘋」披甲，以免前者步戴歷羅斯後塵。
保殊趕命日程
下午3:00 邁阿密起飛
到紐約接到消息即趕回邁阿密
凌晨3:00 BB出世睇完即走
早上6:00 到紐約
早上7:00 正選鬥紐約人（香港時間）
