塞爾特人大迷信 騎呢朗度復出強勢獵「鷹」
塞爾特人大迷信！足球壇迷信行為相信大家聽得多，例如賽前先着右腳波襪、比賽時最後進場、左腳先踏入球場等等，原來連籃球員都啱「呢味嘢」。東岸球隊塞爾特人勁迷信，當中以明早刑滿復出的朗度最「騎呢」，賽前不單只要吃日本菜，Tip Off後的一連串古怪動作更「騎呢」到冇人有！
雷阿倫有比賽唔食晏
擁有三大巨頭加納特、皮雅斯及雷阿倫的「綠軍」屬NBA「耆兵」，36歲老將雷阿倫自爆比賽日子絕不吃午餐，否則就會影響投射命中率；法國悍將比杜斯就例必在開波前食炸雞，豈料連「26歲仔」的朗度亦一樣迷信，自08年總決賽前夕到日本食肆醫肚後，至今一直相信賽前食吞拿魚壽司配以佳得樂飲料，便能重溫奪冠美夢。
之不過講到最「騎呢」，不得不提其開波時的古怪玩波動作！近日有美國球迷特別製作一段4分鐘短片，剪輯了「綠軍」的開波片段，發現但凡塞爾特人於開場跳球後獲得控球權，朗度例牌會作「天才表演」，如胯下運球、屁股控球甚至頂頭槌等等，被問到為何如此古靈精怪，朗度表示：「硬係覺得要玩吓波，個波先會聽話，咁我先可以隨心所欲『派牌』。」
於季後賽Game1撞球證的朗度，坐完1場波監明早復出，這位常規賽助攻王今季面對鷹隊例牌發威（見短文），面對有明星前鋒祖斯史密夫上陣成疑的鷹隊可秤先，「綠軍」主場讓到8.5分照捧上盤。（now635台周六早上7:30直播）
塞爾特人「耆兵」加納特（右）經驗贏晒鷹隊。（資料圖片）
