侯活揸流變衰神

魔術最近爆內亂，兩位主角杜域侯活及教練雲根迪更合演一場超尷尬鬧劇！事緣雲根迪昨日證實侯活逼會方炒教練，「超人」懵然不知被踢爆篤主帥背脊，竟戇居居半途介入訪問兼扮Friend大出洋相，事後侯活懷疑心有不甘Hea打還擊，連累魔術以80:96不敵紐約人之餘更被主場球迷噓爆，「超人」變身做衰神！

有關侯活逼雲根迪下台的新聞鬧得熱烘烘，雖然兩大電視台名嘴奧尼爾及巴克利都相信「超人」，不過雲根迪就當眾揭穿侯活真面目！對於侯活游說會方炒教練傳聞，該位魔術主帥昨晨受訪時大爆猛料：「係真o架！有魔術高層同我證實，侯活猛咁篤我背脊，仲不斷施壓叫會方炒我魷魚。」

記招黑面死撐冇做過

雲根迪的回應令大批記者「O晒嘴」，此時「懵盛盛」的侯活突然參與記招，並搭住雲根迪膊頭扮Friend，在場幾位記者按捺不住開始偷笑，雲根迪及後更獨自走出人堆當侯活冇到，記者亦隨即向「超人」一五一十交代雲根迪的言論，侯活即時黑面並繼續扮好人：「常規賽嚟到大直路，呢個時候我叫會方炒教練？講你都唔信啦！」

據一位知情人士透露，侯活事後非常扯火，昨早更疑似Hea打進行還擊，比賽打了半個鐘依然食白果，全場亦只有8分進帳，戰至比賽末段更被主場球迷柴台，昔日奧蘭多「萬人迷」頓成「萬人憎」，魔術最終亦以16分之差不敵來訪的紐約人，近5年來首次錄得5連敗。

賽後侯活拒絕再回應有關雲根迪的問題，後者更乘機抽水：「我冇得撈唔緊要，不過都唔好輸得咁肉酸吖！」魔術如今一鑊粥，明早造訪76人有隱憂，主隊小讓1.5分寧捧上盤。（now635及678台周日早上8:00直播）

侯活（左）全場入得8分，好似過分咗啲。（美聯社圖片）