熱火拉隊唱K籌款 占士萊利變卡拉之星

今季NBA賽程密集，球員想以最佳狀態應付球季當然要諗計減壓。熱火總經理萊利昨日就拉隊到邁阿密南灘，參加由柏堤亞舉辦的「慈善K王大賽」，「負傷上陣」的勒邦占士與主人家柏堤亞扮女人搶盡風頭，全隊上下玩到癲叉足電，明早「總決賽翻版戰」硬撼小牛有望報卻去屆一敗之仇！

名為「Battioke」的「慈善K王大賽」由熱火老將柏堤亞創辦，該位好好先生自成立「Take Charge基金」以來，就不斷搞慈善活動籌款，為學業成績優異的貧困青少年提供獎學金，柏堤亞表示：「籌款方法有好多種，但我嫌打Golf同慈善晚宴太悶，既然我同老婆都鍾意唱K，咁咪搞個卡拉OK大賽囉！」

占士鍾斯榮膺K王

昔日柏堤亞効力火箭時已於休斯敦舉辦過這個K王大賽，今年就移師邁阿密舉行，昨日熱火總經理萊利、球員韋迪、米克米拿、祖雲侯活及查馬斯等球員都有份出席，就連左手無名指甩臼的勒邦占士亦畀面到場。「大帝」甫到場就自嘲從15歲變聲後就沒有唱歌，但就打頭陣上台，並戴上假髮邊跳邊Rap勁歌《Super Freak》，與同樣扮女人兼披上白色戰衣登場的柏堤亞互相輝映，將現場氣氛推至高峰。

小牛睇動物Relax

總經理萊利本希望借捐錢「化一劫」，但最終難逃被拉上台厄運，被迫高歌一曲《My Girl》，奈何走音又錯拍子瘀爆離場；至於被列為大熱的3分射手占士鍾斯，就贏得今次比賽冠軍。

熱火趁大戰前夕唱K鬆一鬆，小牛前日亦拉隊到達拉斯動物園陪小朋友睇動物，順便Relax一下。

小牛 熱火明碰頭

兩軍齊齊諗計放鬆心情，都是為了明早常規賽上演的「上季總決賽翻版戰」─熱火主場對小牛， 後者續有後衞韋斯及中鋒希活受傷缺陣，熱火有占士承諾無懼手指傷並會紮住上，經歷2連敗的熱火可秤先，主場讓3.5分要上盤。