紐約人負76人5連敗 史碧奇李唔驚「停瘋」
本報記者昨晨踩入麥迪遜廣場公園作現場直擊，雖然紐約人不敵76人連輸5場，「林瘋」又再變「停瘋」，不過J.Lin依然萬千寵愛於一身，獲荷里活著名導演史碧奇李（Spike Lee）同李安力撐、港空姐為林瘋飛赴紐約捧場，可憐紐約人王牌安東尼則火速失寵，連環炒粉遭主場球迷噓爆！
第3日「now TV NBA之旅」迎來重頭戲，現場直擊紐約人對76人的東岸大戰，開波前兩個鐘已坐定定睇投射練習的大導演史碧奇李，賽前於場邊Nice爆接受本報訪問，這位紐約人Die Hard躉依舊一身潮服到場，並自爆已獲得林書豪的D-League版波衫！
李安都係紐約人Fans
林書豪憑超卓演出拯救紐約人，史碧奇李當然對這位華裔新星「神咁拜」，對於J.Lin近期表現跌Watt，史碧奇李處處維護愛將，撐林書豪撐到出面：「林書豪明顯冇初初爆發時咁瘋狂，因為佢依家樹大招風，人人都想砌低佢，對手仲諗盡奸招陰佢添！林書豪依家太紅，班球證已經冇咁易畀J.Lin博到犯規，唔難打就假！不過作為紐約人球迷我唔擔心，我深信林書豪最強大嘅武器就係意志力，就係因為人人都想摧毀佢，佢就更加要自強！」史碧奇李更表示，不應該用姚明與林書豪作比較，畢竟「小巨人」身體質素有優勢，J.Lin的身形始終較輸蝕。
除了史碧奇李，另一國際級大導演李安也到場支持林瘋。旅居紐約多年的李安，出名熱愛體育，紐約人更是他至愛，即使忙着電影工作，也抽空入場一睹林書豪風采。
港空姐飛紐約捧場
就現場所見，不少球迷均穿上林書豪球衣及Tee恤，當中更有3位女球迷於面上貼上J.Lin印水紙，了解過後得知3人正是小記乘搭前往紐約航班時的機艙當值空姐，難怪熟口熟面。3位空姐當中除了Connie是標準紐約人球迷之外，Natalie及Kana都是為一睹J.Lin風采而入場！
林書豪（右）即使表現下滑，但都獲得球迷支持。（美聯社圖片）