獨闖76人更衣室 伊古達拿大讚J.Lin醒

麥迪遜廣場公園加上「林瘋」效應，賽後紐約人更衣室水洩不通相當合理，反觀作客的76人更衣室卻「靜蠅蠅」，僅得3分射手美克斯及昨仗交出19分、7個籃板及8次助的伊古達拿兩支公。

小記於是趁機打擾正在換褲兼露底的伊古達拿，被問到對林書豪有何評價，「小AI」識英雄重英雄：「Jeremy打得好好，速度快打法又醒，外界話佢打法單調，但從球員角度嚟睇，我覺得佢有好多進攻板斧，只係佢以大局為重，願意擔當更多穿針引線工作，作為教練一定會鍾意林書豪呢類球員。我認為Jeremy係爭些少經驗，假以時日一定會成為聯盟至Top控衞之一」

路過阿嬸唔識美克斯

難得闖入76人更衣室，小記當然要「罰佢抄」，成功獲得伊古達拿簽名一個，奈何球隊經理人突然殺出，以更衣室內不准拍照為由驅逐小記，合照美夢宣告幻滅。同場加映一單小插曲，一位路過睇球星的大嬸，大大聲問在場職員：「呢個（美克斯）係邊個？」只見美克斯神情尷尬，極冇癮離開更衣室。