酒店經理爆料 「瘋」宅月租10萬有折頭

林書豪今時不同往日，毋須再瞓梳化，可以舒舒服服住靚屋了！之不過有關J.Lin的新竇地點一直眾說紛紜，有傳前者租住勇士前鋒大衞李爾的Trump Place，然而W Hotel高級銷售經理Richard Nassimi就向本報爆料，坦承W Hotel才是J.Lin的真正落腳點，解開一眾「瘋」迷的疑團。

小記在now TV安排下入住紐約Downtown的W Hotel，首次與酒店總經理韋咸及公關Daniel會面時，2人均以保障客人私隱為由，對林書豪隻字不提。好彩本身搞緊幾個大Project、並於W Hotel主理銷售的Nassimi，昨日帶記者參觀示範單位時突然玩自爆，指林書豪確實住在酒店38樓，並曾經與J.Lin見過幾次面，令在旁的公關Daniel非常不悅。

唔愛出街叫隊友上房

此時小記打蛇隨棍上，Nassimi終於揭開林書豪的宅男真面目：「Jeremy好好仔，謙虛又低調，不過佢經常足不出戶，幾乎每晚都係嗌Room Service或者外賣醫肚，酒店樓下間BLT漢堡就係佢至愛。仲有呀，佢喺紐約人操完都唔夠喉，返到嚟都會用會所嘅健身室，同埋佢試過叫菲爾斯、謝菲利斯同森柏特幾位隊友上房，3個麻甩佬喺房唔知搞乜！」

Nassimi帶記者參觀位處38樓的尊貴套房，雖然每個單位裝潢及布置有別，但大致與「瘋宅」相同。據悉，W Hotel一個至平單位標價185萬美元，加上有可見到自由神像等靚景，難怪林書豪流口水，Nassimi指單位月租要1.3萬美元（約10萬港元），並承認公司向J.Lin提供優惠價，但拒絕透露減幾多。