夢幻隊打奧運高比擔大旗
新季一直負傷上陣的高比拜仁，昨日個人獨取39分帶領湖人主場以97:90擊敗勇士。年屆33歲仍能於籃壇隻手遮天，難怪美國籃協已視「小飛俠」為新夢幻隊核心，計劃任命高比領銜老中青三代NBA球星衝擊2012年倫敦奧運金牌！
入39分反勝勇士
因手腕傷患要Keep住打止痛針落場的高比拜仁，昨仗貢獻39分、4個籃板及7次助攻，成為湖人以7分之差反勝勇士的功臣。開季被指獨食兼浪射，「小飛俠」賽後寸爆回應：「我打咗15年NBA，贏過5次總冠軍，唔通咁都未夠資格射波？」高比愈老愈Fit，明早有權帶隊再下一城，主場讓灰熊5.5分要上盤。
「小飛俠」好波當然寸得起，就連美國籃球事務主管高蘭基路都對前者推崇備至，計劃以高比為核心率領勒邦占士、杜蘭特及贊特拿等老中青三代球星衝擊倫敦奧運金牌。消息指美國籃協將於本月19日向奧委會遞交美國男籃18人初步名單，最後12人名單將於6月18日、即NBA總決賽前公布。
高比拜仁（右）紮住上都攻入39分。（美聯社圖片）
