小牛湖人開季2連敗
NBA剛開鑼就爆名牌災難日！小牛、湖人及公牛3支爭標分子昨日齊齊倒灶，當中衞冕冠軍小牛及「紫金兵團」開季兩連敗各自創下羞家戰績，兩大天王巨星魯域斯基及高比拜仁縱然交足貨亦孤掌難鳴，爭標任務險阻重重！
衞冕冠軍小牛繼開鑼日不敵熱火後，昨回師主場又再令Fans失望，以93:115向金塊俯首稱臣，成為史上第2支開季兩連敗的衞冕冠軍，難怪攻入20分的「德國槍」魯域斯基賽後面如死灰，嬲爆批評球隊「又老又慢欠缺火花」。
德國槍轟隊友又老又慢
另一位球星高比拜仁就更命苦，季前拒做手術的「小飛俠」，昨日戰至第3節終於「頂唔順」，要勞煩私人治療師在場邊為他按摩手腕，即使全場紮住上貢獻了29分、6次助攻及5個籃板，仍無助湖人作客以91:100不敵弱旅帝王，近9年來首次錄得開季兩連敗。
環顧昨日NBA賽事，12場常規賽當中足足開出8個下盤，強如雷霆及拓荒者亦贏波輸盤「唔益人」，美媒《CBS》就將反常戰果歸咎於停擺，皆因列強組軍及正式操練時間均非常倉促，預測這個「亂世賽季」將會造就數支冷門隊伍殺入季後賽。
奇兵勇士明鬥紐約人
最有機會成為奇兵的勇士今季表現脫胎換骨，昨日更爆冷砌低去季東岸「一哥」公牛，為新帥麥克積遜帶來上任後首捷。陣中王牌艾利斯的祖母前日去世，這位「紋身狂人」揚言會化悲憤為力量，明早主場讓紐約人3.5分有力開上盤。（廣東體育周四早上11:30直播）
高比拜仁（左）獨力難支，令湖人開季連吃敗仗。（美聯社圖片）
新隊友冇料到，魯域斯基（右）嬲到爆。（美聯社圖片）
