杜蘭特唔做宅男進軍影壇

NBA進入停擺期後，不少球員紛紛出國「搵食」維持生計、保持狀態。幾位超級巨星杜蘭特、安東尼及保殊，就趁停擺空檔由籃球場踩入演藝界，當中「KD」為圓演員夢決定改變怕醜仔性格博一鋪，誓要效法兩大前輩雷阿倫及米高佐敦揚威影壇！

想學雷阿倫 佐敦咁成功

杜蘭特的宅男形象深入民心，所以兩年前接到拍戲邀請時，「KD」第一時間耍手擰頭，但隨着NBA訓練營及季前賽取消，杜蘭特決定趁空檔挑戰自己，在上月尾接拍電影《Switch》。據悉，杜蘭特將於這部籃球電影演回自己，講述効力雷霆的他與1位高中男孩掉轉了身份，後者在大學籃球賽叱咤風雲，可憐雷霆則衝擊季後賽失敗。

首次正式擔正，「KD」高呼愈拍愈過癮，但就自爆瘋狂NG：「導演要求我連入6球投射，但偏偏就係咁NG。」這部由華納兄弟製作的籃球電影只投資了700萬美元經費，杜蘭特期望片商能夠刀仔鋸大樹，自己的演技得到別人認同：「米高佐敦的《Space Jam》係我至愛，雷阿倫喺《He Got Game》做得非常好，如果我啲演技有佢哋一半就好咯！」

至於紐約人球星安東尼，最近夥拍熱火前鋒保殊亮相美劇《Law & Order:SVU》，故事講述1位明星球員重返母校當教練，但卻被指控性騷擾旗下隊員，劇集將於美國時間本周三全國直播。