陳振興玩命換回報
廣告都話「生命無take 2」，偏偏為山地單車多次炒車跌進山谷險些送命的香港代表陳振興，依然願意為單車賣命。如果以「大難不死，必有後福」來形容「山地興」，「死過翻生」不下十次的他，去年一面廣州亞運金牌正是他多年來玩命換來的最大回報。
成日跌落山
陳振興花名叫「山地興」，完全代表到他對山地單車的熱愛。自14歲開始接觸單車，由落山單車轉型越野單車，陳振興「碌落山」次數不勝其數：「如果我話未試過碌落山你都唔信啦，有次夜晚踩車，憑感覺轉一個平時踩開嘅彎位，平時轉都無咩問題，嗰日就無啦啦『砰』一聲，架車就翻咗，我只係知自己眼前一黑，180度轉之後，一開眼就望住個天，單車壓住我，下面有樹枝『撐』住。好彩嗰度無啦啦生幾條樹枝，下面好深吓，唔係的話都好大鑊。」
最怕見到蛇
「山地興」愈講愈興奮，再分享另一次踩夜車碌落山經驗：「踩夜車只得頭燈照明，其實好危險，嗰次黑到我只憑感覺轉彎，以為轉完就向前直行，點知個彎未完，咪『哎呀』一聲碌咗落山，哈哈哈，下面有個崖壁，碌完落去就大叫，一班朋友好辛苦先拉番我上嚟。」
幸好「山地興」每次意外都僅擦傷手腳而已，不過每次跌得愈驚險，愈增加其玩命決心，樂天的「山地興」將每件死裏逃生的恐怖經歷當成笑話般看待：「山地車畀到我自信，同公路單車唔同，我鍾意係山上面飛嚟飛去。其實碌落山好正常，我碌咁多次都無陰影，我有朋友碌完後被直升機飛行服務隊救走啦，我都無坐過。其實有上就有落，未跌過點會識痛。」
自小在農場生活的「山地興」向來具天生天養性格，一人碌落山不怕，踩夜車「撞鬼」都不怕，卻偏偏最怕遇上蛇：「在山練習無咩好驚，就算撞鬼撞咗都唔知啦，但見到蛇真係腳都軟埋，廣州亞運比賽途中，就曾經見到條蛇，我嚇到腳軟，連上斜都無力，架車仲溜後添，我當時直頭叫咗出嚟，驚到呢……」
嫌profile未夠靚仔
要當山地單車運動員，除要「膽生毛」外，更要長年離鄉別井訓練和比賽，也正是令香港山地單車隊目前依然僅得陳振興一員的原因。陳振興在國內一人練習、一人生活足足9年，捱過多次大賽屈居亞軍的不甘心，去年終於修成正果，奪得廣州亞運金牌，他坦言9年來最難過的是「無出路」：「我22歲才加入港隊，之前幾年咁辛苦練都冇成績，每次都差少少，放棄又唔甘心，讀書又唔好，返轉頭無出路，只可以逼自己繼續落去。」
陳振興以「好難得」形容苦等多年的亞運金牌，目前正為倫敦奧運爭取入場券的他，坦承「想將profile整靚仔啲」：「亞洲賽、全運會一直我都係拎第2名，自己嘅成績還未夠『靚仔』，我想繼續踩落去。」退役對「山地興」來說依然遙遠，要令不怕死的他放棄山地車？相信沒有可能吧。
陳振興小檔案
出生日期：1981年4月24日 （30歲）
外號：山地興
全職年份：2002年
威水史：
2011年•全國冠軍賽山地計時賽金牌
2010年•廣州亞運會山地越野單車賽金牌
2010年•全國冠軍賽海南站山地越野賽金牌、山地計時賽金牌
2010年•全國冠軍賽貴州站山地越野賽銀牌
2009年•山東全運會山地越野單車賽銀牌
2009年•馬來西亞亞錦賽山地越野單車賽銀牌
山地興向記者指出昔日跌落谷口的位置，令他全身傷痕纍纍。
陳振興沉迷在山上「飛來飛去」。
其實有上就有落，未跌過點會識痛。