節衣宿食3萬蚊用兩年

當香港運動員從來都是不划算！像陳振興過去曾因苦無成績，試過兩年內僅以身家3萬元過活，收入比目前最低工資還要低，比賽只能問家人借錢買車，令「山地興」踩下去的原因，只能光憑「理想」兩個字。

為理想貼錢踩車

自中五畢業，於香港專業教育學院讀完證書課程後，便投身社會當了兩年「打工仔」的陳振興，加入港隊前一直以業餘車手身份踩遍全港：「出嚟做嘢時，又鍾意踩車，惟有拎晒啲假期去比賽，放工一、三、五練車，二、四、六做gym，星期日都去踩，全香港的山我都踩過。」

一星期七天未有休息，當時「山地興」笑稱為了單車，返工無晒精神：「返工人哋去食煙的時間，我就跟出去企喺一邊偷雞瞓覺囉，因為當時我好想比賽，所以辛苦都無所謂。」直至02年決定投身全職運動員，「山地興」指當時要「貼錢踩車」：「加入港隊初時無人工口架，得好少資助，買車要買二手，有時要問阿媽借。到02年第一次參加亞洲賽就拎第8名，那年獲3萬蚊資助，就用呢舊錢捱過兩年。」

平均一個月1,250元，比法定最低工資低足幾倍，但「山地興」為了比賽從未埋怨：「我覺得我好開心喎，一路踩落去都好順利，係有迷惘，但幸好家人好支持我，只會怪我成日損手爛腳，依家睇番轉頭都係值得。」