C朗個人騷!球迷歡呼震天河

「銀河鑑隊」事隔6年再度訪華,尋晚皇馬喺天河體育場同廣州恒大踢表演賽,竟然出現唔少吉位,唔知係咪受到刺激,皇馬索性大開殺戒以7:1狂勝恒大,開入球派對報答粉絲,超級風頭躉C朗更以「招積後踭」助攻又入波,氹到現場球迷陷入瘋狂狀態,直情將天河體育場變做自己嘅個人舞台!

場波由香港球證廖國文執法,開賽前影大合照,球迷已嗌到拆天,小記直情係Feel到乜嘢叫震耳欲聾!

寸王勁肉緊揮拳慶祝

皇馬早喺7分鐘就由基迪拉接應賓施馬傳中頂入,之後C朗禁區頂被趙元熙掃跌,當佢擺出招牌甫士準備射罰球,粉絲情緒更高漲,成個場都變晒C朗躉,可惜C朗射唔中目標,搞到莫連奴睇到叉晒腰。

之後C朗禁區頂推順起腳僅高出,現場球迷又大嗌,部分仲戥佢唔抵添。31分鐘,奧斯爾接應基迪拉直線扭過對手門將射入空門,跟手恒大換走郜林同鄭智,當輸咗算數。39分鐘,C朗終於有嘢畀球迷睇,呢位萬人迷以招積後踭交前,賓施馬左腳射成3:0,場邊嘅莫連奴鬆一口氣兼揮拳慶祝,相當緊張C朗表現。

換邊後3分鐘,賓施馬接應馬些路傳中破網,皇馬領先到4球。其後等足差唔多60分鐘嘅球迷終於盡情狂嗌,C朗趁對方門將出迎以招積後踭入波,全場Fans狂叫,分分鐘嘈過放煙花。其後謝斯及迪馬利亞分別建功,完場前恒大由楊一虎射入破蛋,最終皇馬以7:1大勝恒大。比數係點都好,你要球迷數番邊個有士哥,印象最深咪又係C朗後踭入波囉。

滿足Fans唔介意恒大留力

呢場波皇馬大部分主力踢咗60分鐘,相反恒大未完半場已收起主力,賽後莫連奴話:「聯賽對恒大先係最重要,今場波我哋負責宣傳同滿足球迷,重要性都好高。」有傳西甲下季為遷就中國市場提早開波,寸王話無任歡迎:「我哋比賽完可以更早返屋企,休息備戰歐聯。」尋晚皇馬大軍已坐專機離開廣州北上,備戰周六對FC天津嘅比賽。

C朗(上)再一次顯示其驚人彈跳力!

9成天河體育館場內嘅粉絲,都只係為C朗歡呼狂嗌!

卡卡(右)今仗又食白果,相信佢喺皇馬真係前程似「咁」。

寸王(左)與李章洙識英雄重英雄。

卡卡一上車就即刻食嘢,好肚餓咩?

恒大難得有幾位靚女球迷幫手打氣。