米蘭雙雄訪京袋1.68億

米蘭雙雄答應喺北京鳥巢合演意大利超級盃，全因錢作怪，《羅馬體育報》大爆，呢場波兩支球隊估計可以袋走1,500萬歐元（約1.68億港元），商業價值相等於普通歐聯分組賽4倍收入，而且收睇直播嘅觀眾會多過意大利6,000萬總人口，難怪山長水遠都要趕到北京開波。

阿里基暗示回購卡卡

今屆超級盃門票最貴3,999元人民幣，票房收入超過1億人仔，加上來自各方面嘅贊助費有3,000萬人仔，報道話AC、國米各自有135萬歐元基本出場費，加上贏波獎金、電視轉播同門票分紅，兩隊收入估計達到1,500萬歐元，商業價值等於普通歐聯分組賽4倍，呢個數字，比起米蘭雙雄、祖記、羅馬、拉素、拿玻里同熱拿亞以外嘅任何球隊，單季使費都要多，所以今屆超級盃決定繼09年後再次喺鳥巢舉行。

超級盃星期六至開波，尋日AC進行今次北京之行唯一公開操練，原定朝早10點開操，8點奧體中心已經聚滿球迷，期間卡斯辛奴畀堤亞高施華撞低，起身後指住對方喪鬧，表現得勁肉緊，粉絲當然睇到o依嘩鬼叫，期待超級盃嘅來臨。

至於帶埋尼斯達出席記者會嘅AC教練阿里基就暗示可能會回購卡卡，球迷聽到當然受落啦。阿里基話：「AC需要嘅係高質素球員，我覺得卡卡正係呢類球員。」