新萬人迷37萬日薪多過葡國國民年薪3倍
C朗威番鋪！據葡萄牙網站《足球金融》最新公布嘅球員年薪排行榜，C朗以1,200萬歐元壓住美斯排No.1，雖然計埋獎金係美斯多啲，不過C朗一日搵嘅錢係葡萄牙國民年均收入嘅3倍，一樣咁威，服未？
「新萬人迷」C朗年薪冠全球，除開計月薪係100萬歐元，平均每日搵3.3萬歐元（約37萬港元），報道指佢一日嘅收入就等於葡萄牙國民平均年收入3倍，真係羨慕死人。咪O嘴住，要知道呢條數係未計佢嘅廣告同其他收入，一旦計晒，C朗全年係賺3,000萬歐元（約3.34億港元），仲勁！
之不過，一旦連番埋廣告同其他收入計算，原來美斯又反壓C朗，皆因美斯喺巴塞嘅收入除咗固定年薪，原本仲有多達500萬歐元嘅獎金未計，加埋佢嘅驚人廣告收入，最後得出嚟條數係3,300萬歐元（約3.68億港元），即係咩？又食住C朗囉。