莫帥三訪皮具城掃絲巾手袋

莫連奴終於出手喇，不過唔係買球員，係買手信至真！呢位皇馬主帥前兩日都去過廣州白雲世界皮具貿易中心，2次都空手而回。以為佢混吉咩？原來佢係睇準先入貨！尋日佢再率領教練團出訪皮具中心，仲一口氣狂掃絲巾加女人手袋，滿載而歸！唔知莫帥買女人嘢有冇買球員咁好眼光呢？

行足成朝專吼平價貨

「寸王」連日空降皮具中心，唔少商戶都以為佢係大豪客，點知佢頭兩日只係齋行冇幫襯。直到尋日朝莫連奴再次殺去商場，再一次引嚟大批球迷聚集門外守候，人山人海場面熱鬧。商場亦明顯加強保安，甚至限制人流，希望畀呢位名帥安心掃貨。

嚟足三日，「寸王」今次當然有備而來，佢原來對一間絲巾店情有獨鍾，喺店內掃咗唔少貨，但由於只屬粗嘢，加埋唔使1,000蚊人仔。同時，莫帥仲買咗幾個女人手袋，一樣係廉價貨色，質量一般。行足成朝，「莫家軍」個個拎住個大膠袋離場（圖），係就係「娘」啲，但佢哋絕唔介意，據聞仲有部分貨品由舖頭直接送去酒店。

莫帥三訪廣州白雲世界皮具精品中心成為國內傳媒焦點，連商場都忍唔住發新聞稿。雖然佢消費唔算多，但已經幫個商場賣咗一次全球性廣告，以後個場實客似雲來啦！