何雁詩篤波夠料做第4條Q

表面上看，高爾夫球和桌球都是用一支（桿/Cue），把球（推/篤）入（洞/袋）的高難度運動，但實際上似在哪裏？「大家唔係講快，屬Mental Game，不停重複一個動作又講求穩定性，腦袋要快急轉彎，用腦思考同Picture出嚟嘅運動……」Stephanie還自爆：「曾經諗過唔打Golf嘅話會打桌球，以前讀書試過走堂去篤波，不過我覺得桌球難打啲，好唔明兩個波咁圓，點解撞完之後可以去到你想去嘅位置。」有興趣跟Marco偷師嗎？「OK喎！我夜晚先返入電視城排舞。」就是這個可遇不可求的機緣下，今期「齊來玩過界」得以加插「續集」！

連小記在內一行5人享用過Marco請客的美味齋菜午餐後便殺上桌球室，「傅天王」返回「自己地頭」盡顯Professional一面，先把各式Cue棍及Rest用具「冷晒」，Stephanie看到目定口呆，一臉不可思議！定過神，「巨聲」聽完握Cue位置、力度、企位、姿勢等基本講解後Show time。哈！一Pot就把紅波篤入尾袋，今次輪到Marco嚷：「唓！識打嘅！」大家也起哄：「原來又係揼雞王！」逗得小妮子笑不攏嘴，連環擺出V字手勢。

幾乎學晒天王絕招

眼見「徒弟」已非初學者，傅家俊便提升難度，教高一層次的白波控制和Cue法，掹後、Dup停、長枱Pot波、揸Rest……Stephanie悟性甚高，幾乎全部學上手，難怪她愈打愈有癮，Marco亦愈教愈用心，兩人還不停討論如何運用打高爾夫球的理念放在桌球枱上。最後，「巨聲」接受7大測試（見下文）表現誇啦啦，在場人士都笑說：「好有潛質做香港桌球第4條Queen！」

大讚Marco「打波超型」

「感覺好爽啊！」Stephanie坦言打桌球比想像中複雜得多：「之前以為篤中個波已經好叻，原來好講求計劃同部署，Pot完波要諗埋白波走去邊，真厲害，Mindset要好清晰。其實Golf同樣着重Plan ahead，但我以前忽略咗，今次學完桌球幫我Remind番呢樣嘢。」「我睇Marco打嗰陣，覺得佢超級型！成件事（打桌球）勁晒！」她表示已成為「傅天王」Fans，將來會多留意「偶像」比賽消息，還會相約班「巨聲朋友」篤波作樂，順便大騷Quali呢！

Stephanie桌球小測試

第1關•出Cue是否夠直（白波來回成一直線）1次OK

第2關•高Cue（篤入目標球＋白波向前走）1次OK

第3關•掹後（篤入目標球＋白波溜後）第2次搞掂

第4關•Dup停（篤入目標球＋白波停定）第2次搞掂

第5關•一箭雙鵰（篤入目標球＋白波緊隨入袋）1次OK

第6關•準繩度（將白波長枱篤入尾袋）1次OK

第7關•揸Rest（篤入遠枱袋口目標球）第3次過關

Marco評語：

Stephanie本身識打，基本Pot波冇問題，我教就易好多，唔使由頭教，等佢學深入啲嘅嘢，其實打桌球最難係Cue法，但佢上手快，尤其係女仔更加難得，打得咁好我都估唔到。

Marco評分：

9分（10分滿分）！測試有難度都搞得掂，唔簡單！

Stephanie Ho

年齡：18歲

威水史：16歲第一次贏香港女子高球賽冠軍

　　　　以67桿打破粉嶺高球會（女子白色發球台）最低桿數紀錄

　　　　參加《超級巨聲》歌唱大賽

　　　　17歲擁有自己主唱的歌曲《撲火》

　　　　18歲代表香港出戰廣州亞運