好老公廿四孝爸爸 家庭第一

「只要返屋企見到老婆同個女，做嘢幾辛苦都唔記得晒！」周定宇被喻「魔鬼舍監」，私底下可是個溫柔體貼好老公兼廿四孝爸爸，每日放工最大樂趣就是跟2歲大寶貝女Shayla（周荔蘭）玩耍，放下威武形象，甚至願意笠頂Hello Kitty大頭套「扮Cutie」，只為博囡囡一笑！

用金牌向日籍太太求婚

都說任職馬會福利好，周定宇獲配雙魚河騎術學校內的宿舍，環境清新空氣好，一家3口生活舒適。採訪當日走進舍監家裏，客廳滿布玩具、公仔恍如兒童樂園，周爸爸一見小蝴蝶打扮的女兒即冧樣盡現，又抱又錫，原籍日本的周太太則為記者準備好下午茶小點，感覺親切又窩心。

周定宇擁有幸福家庭，緣於一段在北京萌芽的港、日戀情。「98至02年喺北京讀書認識咗日籍太太，我成日整蠱人，佢最初對我印象麻麻，後來加深認識互有好感，開始拍拖。」

「囡囡健康開心最重要」

對於愛妻的付出，他表示無言感激：「我太太一句中文都唔識就跟住我嚟香港，嗰陣我仲做緊運動員，冇乜經濟能力，大家同甘共苦，咁多年佢一直喺背後默默支持我，識到佢，我覺得自己好幸運。」周定宇03年在澳門第3度勇奪世界冠軍（槍術）後以金牌求婚，終娶得美人歸！

這天小Shayla拿着爸爸3面世界賽金牌玩到愛不釋手，記者提議將來給女兒做嫁妝，周定宇笑到合不攏嘴：「囡囡出生之後令家庭更完美，亦學到點樣去做人父母，明白當年阿爸阿媽有幾辛苦。」他透露教女方法軟硬兼施，笑說跟太太輪流扮演「天使」與「魔鬼」：「最緊要小朋友開心，有健康嘅成長生活，長大後先唔會害人，對社會有貢獻。」周定宇還自豪謂：「Shayla好黐我o架！依家家庭佔我人生第一位，個女同太太都係我寶貝！」