詠春 x 洪拳體能訓練超攞命

周定宇不騎馬不賭馬，但希望訓練出世界級騎師，他為學員制訂的體能訓練計劃超「攞命」，還破天荒加入功夫元素，準騎師個個識詠春、洪拳；就算不少學員受訓初期「頂唔順」逃走，但「魔鬼教練」絕不心軟，對女仔也一視同仁：「冇足夠體能點駕馭隻馬？有乜依郁會好大件事！」

試過一星期走5個

「我Set嘅Programme係專業運動員水平，班小朋友喺上水受訓9個月，一定要喺短時間適應高強度訓練，所以頭3個禮拜流失量特別大，最高紀錄係第一個星期走5個！」周定宇透露學員操到「雙手抬唔起食飯」，每天要接受戲稱為「鐵兔、鐵鴨、鐵殭屍」的下肢訓練，人人喊苦。「騎馬講求意志力，唔可能騎騎吓攰就放隻手落嚟，要同隻馬抗衡，少啲體能毅力都唔掂。」

見習學員頭3個月「齋」操體能，直至下肢能老樹盤根，習騎術自然事半功倍。之後會加入其他輔助訓練，其中「打功夫」最令他們感到新奇。究竟練詠春、洪拳對策騎有甚麼幫助？「『二字拑羊馬』屬詠春步法，同騎馬形態相似，都係大腿內側輕輕夾埋，形成一個三角形，練到持久力；『黐手』係詠春拳對練方式，訓練速度、變換、短距離時間反應，對佢哋喺馬背上控制韁繩好有用，就算馬匹動作突然改變，都有足夠靈敏度去做應變。至於洪拳則求短促爆發力，可以加強同馬匹抗衡力量。」武術堂每周2次、每次練足2小時。

轉Programme增新鮮感

周定宇補充，還會安排如打War game、踢足球的活動：「Set programme都要不斷加加減減，轉換吓項目，好似餐廳Menu咁，等學員有新鮮感同刺激，年輕人先容易進步。」