魔鬼舍監 學識轉彎

武術跟賽馬本應「大纜扯唔埋」，誰想過3屆世界冠軍（槍術、劍術）周定宇會放棄進軍影壇做武打明星的機會，甚至丟低教拳老本行，心口掛個「勇」字跑去香港見習騎師學校擔任舍監兼體能教練，而且一做就5個多年頭。他不僅教導學員耍詠春、打洪拳，更多是練就年輕人品德意志。周定宇坦承任職期間遇過不少困難，強硬手段更曾被投訴，但「教人自學」讓這位鐵石心腸的舍監學懂「轉彎」、「將心比己」，還自喻「魔鬼、天使混合體」，唯一沒變的，是「堅持到底就是勝利」的原則。

先有伯樂、然後才見千里馬！前香港羽毛球名將陳念慈（Amy）06年毅然離開體育圈，成為香港賽馬會見習騎師學校校長，並不斷引薦運動員加入馬會工作，周定宇，就是其中一匹千里馬。「最初Amy打過兩次電話嚟，淨係話有份工都適合我、好有挑戰性，但我都唔太在意，因為唔知實質做啲乜。再過多一個星期，Amy第3次來電，佢話『你可以訓練到一班香港馬壇青少年去代表香港出外參賽，甚至蜚聲國際。』聽完呢番說話，突然好有使命感，有啲心動，於是再同Amy詳談後，決定試吓呢個職位。」周定宇駐守的上水雙魚河，是每年所有新學員第一個受訓地方。

一味靠惡收Complain

新舍監「初嚟埗到」，滿以為「一味夠惡」就可勝任，然而霸道作風令他與學員關係差到極點，或多或少成為工作上的絆腳石：「啱啱開始嗰陣太過鐵腕，做事唔識轉彎，一定要跟足我Order，（練體能）做唔到都要做，做到得為止……雖然呢種都係好方法，但大家關係搞得好差，唔可以話佢哋好憎我，唔喜歡就一定係！」有冇試過被學員Complain？「當然有！不過都要接受！我會緊守宗旨，教好班學生，投訴甚至公然挑戰都冇問題，我咁嚴厲都係想學員受益，唔會行差踏錯。」

受軍訓學識紀律服從

嚴師出高徒，周定宇要求苛刻，很大程度上是因他習武出身，以及昔日在北京讀書時受過半年軍訓的影響。「武術講求尊師重道、禮義、武德；做人最緊要有禮貌，每朝見到人一定要打招呼，笑面迎人，唔准黑面，咁先可以喺歡樂和諧環境下工作，呢樣亦係入學第一樣要做嘅事。

當然，永遠開學頭3日，學員見到你都唔叫早晨，我就會鬧『係咪食咗啞仔藥？』『咁唔願意，唔好嗌囉！』我要佢哋知道嗌人早晨唔係醜事，係基本態度同互相尊重。」這位「魔鬼舍監」又說：「受軍訓那段時間，令我學識紀律、服從，教官Say Yes唔敢Say No，做到鬧、做唔到都鬧，但我哋要接受，轉化到職場上亦一樣，要忍、要堅持，『堅持到底就是勝利』，係我教導學員嘅首要原則。」

關係好轉愈做愈Enjoy

堅持，是周定宇的人生態度；但學懂「變通」才讓他在教學過程中更得心應手：「第3年開始我有少少改變，識得圓滑啲，會企喺學員嗰邊諗，顧及佢哋感受，聽心聲、多溝通，建立一個亦師亦友關係，嘗試軟硬兼施，用引導性手法提高佢哋嘅能力，依家同班小朋友融洽咗好多！」笑言自己「魔鬼教練天使心」的他不諱言，教見習騎師難過教運動員，需要更多的耐性令學員認清明確目標。

儘管過去5年費盡心血，有時更吃力不討好，惟眼見「徒弟們」學有所成，那份成功感的喜悅是難以言喻。「最初入職只係諗住試吓做2、3年，但愈做愈Enjoy，點樣將一班性格、體能、品行都唔同嘅小朋友訓練成馬壇未來棟樑，挑戰性好大，呢樣亦係我愛上呢份工嘅主因。」

「唔止學員，做舍監都要一邊教一邊學，對自己嚟講其實都係一種人生磨練！」周定宇慶幸當年有「伯樂」賞識，做出正確抉擇：「轉工？暫時真係冇諗過！」

認識周定宇

出生日期：77年1月4日（34歲）

婚姻狀況：已婚（太太為日本人）、育有一女

學歷：北京體育大學武術系學士

現職：香港賽馬會見習騎師學校舍監/體能教練

威水史：05年東亞運對練金牌

04年亞洲賽對練銀牌

03年世界賽槍術金牌、對練銀牌

01年世界賽槍術、劍術銀牌

99年世界賽槍術金牌、劍術銅牌

97年世界賽劍術金牌