安東尼扮女人出騷落力過打波
等到頸都長，恨打季後賽恨到發燒的紐約人終於夢想成真，昨日以123:107大勝騎士後，卒之奪得7年來首個季後賽席位。紐約人自伊榮時代後從未威過，今次有望重拾90年代光輝自然令球迷興奮，然而安東尼自加盟後出騷多過打波，前晚就上電視節目扮女人搞笑，加上季後賽首圈便要硬撼熱火或塞爾特人，今鋪似乎「過到初一，過唔到十五」！
足足有7年無緣季後賽的紐約人，本與木狼締造着聯盟史上最長「季後賽荒」紀錄，幸隨着比立斯、安東尼及史杜迪米亞的加盟，搖身一變成為實力分子。三巨頭昨日合力轟入76分，協助紐約人於主場以16分之差大勝騎士，並以38勝38負的成績、自04年後首度躋身季後賽，總算在名宿伊榮退役後寫下球會史上光輝一頁。
鬥熱火「綠軍」晉級唔樂觀
賽後安東尼透過Twitter表示：「季後賽對邊隊都唔重要，不過有心理準備肯定惡打！」有球迷指安東尼入到季後賽就當完成任務，明顯缺乏鬥心。「甜瓜」自轉戰紐約後曝光率大增，出騷次數比練波更頻密，前晚就應邀擔任美國史上最長壽搞笑節目《Saturday Night Live》的嘉賓，並於節目中扮女人Show演技，似乎Enjoy做騷多過打波。
目前排東岸第7的紐約人尚餘6場常規賽，即使最終能殺上第6位，季後賽對手亦不出熱火或塞爾特人，以紐約人的默契及後備兵源，首圈畢業機會極高。由於「A米」今季場均上陣時間達37分鐘，肩、頸、小腿及足踝均有傷，明日主場鬥速龍隨時休戰，故客軍受讓6.5分寧博下盤。
安東尼（中）帶領紐約人殺入季後賽，可惜極可能要硬撼熱火或「綠軍」。（美聯社圖片）