魔術鬚爭標決心苦了列迪克
常規賽進入大直路，已鎖定季後賽資格的魔術為爭標「鬚」決心，昨日經一輪商討後度出「騎呢」招數，一日未提早畢業都不會剃鬚，實行留鬚明志團結一心！可憐天生「溝死女」的列迪克，則為這場「鬚根Show」叫苦連天。
超人建議剃光頭被拒
魔術於去屆東岸決賽飲恨，今季捲土重來引入亞連拿斯及積遜李察遜組成金鑽陣容，務求染指總冠軍。為求全隊上下團結一致，魔術老將昆田李察遜提議全體球員在季後賽止步前不准剃鬚，意味着一旦魔術順利殺入總決賽，全隊上下將要留鬚3個月。
據悉，向來花臣多多的杜域侯活亦有不少意見，例如全隊剃光頭，但建議已被隊友拒絕，「超人」稱：「留鬚都唔錯，但對年輕球員嚟講比較難捱。」據《奧蘭多哨兵報》爆料，杜域侯活所指的年輕球員正是列迪克。該位青靚白淨射手經常惹來不少狂蜂浪蝶，對於今次留鬚決定難免「牙痛咁聲」：「昆田李察遜呢次真係大整蠱，我冇晒女Fans實唯佢是問！」
列迪克有「怨言」，魔術教練雲根迪昨日亦再大發牢騷，炮轟傳媒忽略杜域侯活：「喺大部分傳媒眼中包括《ESPN》，似乎已經揀硬戴歷羅斯做MVP，佢係好波，不過講到得分、防守同籃板嘅話，我認為杜域侯活先至係No.1。」
