李偉倫：阿香Vs阿庭勝負關鍵

紅黃終極戰是本地籃壇焦點，以往曾先後協助兩軍稱霸銀牌與聯賽的前香港隊代表李偉倫，雖則認為「判輸嚟打」的南華會在心態上佔優，卻強調若永倫的「阿香」能在關鍵時刻壓制南華的得分機器羅意庭，「黃金戰士」或能就此封王！

「阿倫」認為南華心態上的優勢將助他們在今晚取得勝利：「打籃球就係咁得意，南華由負方出線，今場一定要贏，豁出去打就會有驚喜，反而永倫今仗輸咗仲有價講，兩者喺思想上嘅分別會影響到臨場發揮。」

兩軍心態有別

被李偉倫譽為當今香港頭號得分機器的「阿庭」，上仗對飛鷹交出27分狀態回升，但「阿倫」卻擔心南華會是「成也阿庭、敗也阿庭」：「之前打工商盃，南華喺冇羅意庭嘅情況都贏到永倫十幾分，班波仲有隊形，依家大家可能會有種心態靠晒呢位重心，我認為『阿庭』嘅回歸其實有好有唔好。」

永倫要贏波，「阿倫」深信四巨頭必須有全場高水準的穩定發揮，其中周迎堅落低位打周家駒會是「黃金戰士」的一大殺着。至於上次交手的奇兵蔡芳裕，面對有備而來的南華，恐難再找到着數。至於最令「阿倫」期待，則是狀態大勇的「阿香」與「阿庭」的Match-up，「阿香」能否在關鍵時刻凍結「阿庭」，將成永倫爭標的最大關鍵。