狙擊熱火哀兵湖人獵鷹8連勝
高比拜仁醒定勒邦占士勁？明早熱火硬撼湖人的矚目大戰自有分曉！兩大勁旅近期各走極端，「紫金兵團」剛錄8連捷兼有「小飛俠」榮升史上「得分王」第6位；反觀熱火就持續低迷繼續輸，就連積遜教練亦意氣風發，窒熱火球員應該「匿埋喺廁所喊」，實行為明早的大戰撥行火！
湖人自「全明星周末」後順風順水，昨日憑高比拜仁攻入全場最高的26分，作客以101:87大勝鷹隊豪取8連捷。光芒四射的高比仔更藉今戰達新里程碑，成功以職業生涯累積27,423分超越名宿摩西馬龍，攀升至NBA史上「得分王」第6位，賽後更謙虛以「幸運」來形容這項成就，盡顯球星風範。
積遜寸熱火輸唔起
之不過教練積遜則得勢不饒人，對於熱火日前被踢爆有球員「輸到喊」，「禪師」賽前乘機「抽水」，向洛杉磯記者汀格（@KevinDing）表示：「呢度係NBA，大家都係成年人，如果你真係輸唔起，都請你匿埋喺廁所喊，咁就唔會畀人見到！」
保殊怨冇波掂
被窒到上心口，坐擁三巨頭的熱火繼續「唔爭氣」，儘管韋迪及勒邦占士昨仗合力轟入69分，奈何整體表現明顯欠火花，最終在主場以96:105向拓荒者俯首稱臣，錄得5連敗劣績。更令人擔心的，是「閃電俠」韋迪昨仗一反常態，於比賽末段頻頻單打獨鬥，似乎對近期經常絕殺失手的「大帝」失去信心。至於另一巨頭保殊，亦埋怨持球時間太少，三巨頭擺明有心病。
湖人與熱火明早正面對撼，雙方於去年聖誕交手時由熱火勝出，如今「紫金兵團」士氣如虹，除高比拜仁狀態大勇外，就連阿堤斯及拜林亦打出水準，湖人作客受讓1.5分寧捧下盤。
高比拜仁（右）又達到職業生涯另一個里程碑。(美聯社圖片)