熱火4連敗輸到喊
「MVP大戰」戴歷羅斯又贏勒邦占士！事隔不足兩個星期，公牛與熱火昨晨於NBA常規賽再續前緣，作客的羅斯再做贏波英雄，相反「大帝」又一次絕殺失手，令熱火錄得4連敗。賽後教練史普斯達大爆球員輸到喊，信心面臨崩潰！
熱火昨仗貫徹虎頭蛇尾作風，首兩節順風順水佔盡優勢，下半場卻突然跌Watt。公牛控衞戴歷羅斯攻入全場最高的27分，多次高難度剷籃均贏盡掌聲，反觀失誤頻頻的韋迪及占士則於比賽尾段連環「炒粉」，最終熱火主場以86:87輸波，今季3次碰頭皆向公牛俯首稱臣。
韋迪後悔冇過公牛
連同早前不敵紐約人、魔術及馬刺，熱火已經錄得4連敗，教練史普斯達賽後更向佛羅里達州記者韋達文（@IraHeatBeat）爆料，謂熱火士氣極度低落：「有幾個球員喺更衣室喊。」至於隊長韋迪則大講晦氣說話：「咁多人都憎熱火，今日我哋輸波，照計全世界都好開心。」
「閃電俠」去年夏天回復自由身，公牛王牌戴歷羅斯曾發短訊力邀韋迪加盟，如今公牛沒有三巨頭卻比熱火打出更好成績，有芝加哥記者就爆料，指韋迪近期曾向好友呻笨，對當初未有加盟公牛表示「遺憾」及「後悔」。
熱火今季13次絕殺失敗
根據《ESPN》統計，熱火已經連續13次未能在落後劣勢下，憑完場前10秒內的投籃追平及反勝對手，占士賽後一力承擔全部責任，似乎下定決心要率領熱火反彈，明早主場小讓拓荒者4.5分，一於捧上盤。
韋迪（黑衫）比賽末段頻頻射失，令熱火慘遭4連敗。（美聯社圖片）