黃金寶 沒有犧牲賺晒至真
由「兩王三后」為首的「香港英雄們」於2010年取得大豐收，以37歲高齡再奪亞運金牌的黃金寶最令人拜服，無愧本地體壇「星中之星」！這位「亞洲車神」難得忙裏抽空接受本報專訪，回望過去、展望未來，告訴大家「車神是怎樣煉成的」！「阿寶」由屋邨招積仔變巨星，踩上世界之巔，縱已年近40，但仍未肯言休，心中團「單車火」還在燒到「(慶)合合」，明言無悔走上單車不歸路，更將20載奮鬥史形容為：「沒有犧牲，賺晒至真！」
我們的黃金寶曾被國家主席胡錦濤形容為「比黃金還要珍貴的寶貝」，究竟甚麽是這位「寶貝」的最難忘時刻……91年亞青封王？錯！07年贏世界冠軍？錯！１0年3奪亞運金牌？都錯！
20年前，新娘潭一場計時賽，初出茅廬的「阿寶」越過對手後懶型說：「走先喇！」結果最後被對手反先……原來這才是他職業生涯最難忘時刻，重提瘀事，他罕見笑得燦爛，卻帶點尷尬：「過終點後梗係想搵窿捐啦，嗰次最深刻唔係輸獎，而係唔知點解自己咁年少氣盛，咁衝動講呢句說話。」
幸運的是，沉重打擊反而鋪出「封神」之路：「單車係修煉同鍛煉自己嘅好工具，呢個時候真正愛上單車運動嘅內涵，感受好深。」踩單車都有內涵？好神。
長年沉醉在單車世界，「阿寶」踩到出神入化，對其他事物興趣不大，既沒facebook、更無微博，自言買了部iPhone已是一大突破：「或者做完運動員，對追求精神較為強烈，對周邊事情唔係太在乎，睇番自己性格，呢個都係好事，但喺香港可能會有啲怪。」
沒facebook微博周邊事不在乎
教練沈金康曾透露，香港單車隊員一日不踩車會腳痕，馬上於現場查證，「阿寶」淡然回應：「其實落雨落冰都冇特別，對我嚟講心情最緊要，最惡劣環境其實係運動員心裏有想法，或者想屋企、想香港或想朋友，甚至喺重複訓練中迷失咗，呢啲先係最恐怖。」
「阿寶」談起單車事雙眼總會發光，到底除單車外，能否即時講出另一嗜好呢？他認真沉思一會，答案還是一如所料：「真係冇喎，諗住話踩街車，但你又話單車唔得。」
其實，這位「出塵車神」偶爾會聽歌，鍾意聽咩歌呢？「有時都會聽歌或音樂，主要都係慢歌，最緊要旋律同節奏好，有時會聽同一首聽到厭先轉。」最欣賞邊位歌星？「冇特別留意歌星喎，間中都會睇歌詞，覺得啲人寫嘢好犀利。」最後，始終說不出一首歌名。
車隊訓練時間超長，入戲院睇戲太奢侈，「阿寶」多於房間睇碟，約兩個月睇一套戲，上次那套叫《越光寶盒》，嘩，好爛喎！「唔係吖幾好笑喎，對於我哋呢啲簡簡單單嘅人OKo架喇！」
愛上咖啡同樣苦盡甘來
聞說「阿寶」最近愛上歎咖啡，在場其他人只飲普通咖啡，他就喝下兩杯炭燒的。「近幾年真正鍾意飲咖啡，之前去歐洲比賽更多機會，出外比賽激烈，有時都想靜吓，飲咖啡地方環境好，可以調整心情。」
咖啡與單車，令人上癮，同樣苦盡甘來，對吧？「其實都幾似，鍾意一樣嘢就會愈來愈投入，想做得更好，依家我繼續keep住踩，每次都有新體驗。」
「阿寶」與師弟郭灝霆愛踩車，也愛咖啡，有何金句勉勵一眾後輩？「其實踩單車好簡單，只要熱愛呢個運動，唔需要諗好多，但唔鍾意就要停，要喺自己項目度搵興趣，其實做咩工作都係一樣，搵到樂趣可以堅持好耐，有成就係完美結果，就算冇，過程都有好多得着。」
過去20年，「阿寶」幾乎為單車放棄一切，離鄉別井、與家人女友聚少離多，沒節日、沒假期……回想多年車手生涯，種種犧牲值得嗎？「冇！我冇嘢犧牲過，反而賺咗至真！」
比黃金更珍貴的寶貝
出生日期：73.3.13
成長地方：沙田
星座：雙魚座
最愛食物：湯麵
最愛飲品：咖啡、果汁
減壓方法：聽音樂（抒情歌）
個人榮譽：香港十大傑出青年、銅紫荊勳章得主
後記
體壇發哥謙過龍
認識黃金寶近20年，既是舊街坊更是小學校友，目睹他由黃毛小子變世界冠軍，實在「老懷安慰」。「阿寶」雖已「升呢」「神級」車手，但依然是那副「零架子」乖男孩模樣，甚至有點「謙過龍」！難怪身邊同事說他是「體壇發哥」、平民巨星。
「阿寶」渾身發放正能量，總說想推廣全民運動，鼓勵市民齊齊動起來；看他落落大方，處處顧全大局，誰還想當三姑六婆闖進他那情感禁區？！
黃金寶
他鼓勵人看電影，理由是：「起碼有個幾鐘頭集中精神，就算好爛都可以專注睇佢有幾爛嘛！」
阿寶征戰多年獲獎無數，這些只是他家中一部分「戰利品」。
