戰勝老沈守信踩落去

談起「阿寶」與「老沈」的關係，少不免搬出「你教一日，我踩一日」這經典對白，承諾一守16年，卻成為「金」牌師徒另類競爭；黃金寶豪言單車手踩到40歲一樣掂，反而沈金康教練去年全運會後表明想愛徒下屆做觀眾，近來又催促他好好計劃未來，難怪「阿寶」「得戚」地說：「係佢動搖先o架！」

沈金康縮沙想抖抖

「以前成日有人講，『阿寶』向『老沈』承諾過，只要你教一日，佢踩一日，其實一直都係咁，我到依家都冇話退先。」黃金寶承認曾有掙扎，最終仍堅持繼續。對於恩師率先「縮沙」，他說：「教練睇到一個運動員去到晚期，要考慮體能問題，依家承諾兌現咗，所以好放鬆。」

「阿寶」自言未想過有今日成就，多得「老沈」逐點填補：「其實係機緣巧合，自己鍾意單車，一路有成績都係佢填上去，佢想我做咩運動員或者乜性格，我都願意接受。」事實上，黃金寶的低潮期是由公路賽轉記分賽，亦全靠教練協助捱過：「轉新項目從頭嚟過成日輸，多得佢引導，3年後開始訂目標，終於喺世界賽勝出。」

本想與恩師衝擊奧運，無奈時不與我。「因年紀問題好難再戰奧運，如果我有多十年體能，一定繼續。」再談與「老沈」關係，「阿寶」強調「仍是師徒，不是父子」：「都係教練同運動員，佢習慣唔想太Close，咁耐以來坐底傾我將來加埋冇10次。」「阿寶」沒有偶像，卻最尊敬恩師，也視他為學習對象：「有時諗嘢會諗如果係『老沈』會點處理呢，佢人生經驗豐富，思維長遠而正面，係我學習榜樣。」