終極夢想贏奧運獎牌

亞運獨攬1金1銀，「阿寶」給自己幾多分？「8分啦，亞運會成績有驚喜，但其他賽事有啲閃失。」那下個目標呢？「之前同沈教練傾過，單車隊最缺奧運獎牌，個牌可能要好多代人先拎到，呢個係我最大願望，不論2012年（倫敦奧運）踩唔踩，都想幫香港車手圓夢。」

黃金寶代表香港，亦代表亞洲，談及08年於日本獲亞洲單車聯會宴會獲獎時特別激動：「07年贏世界賽（場地捕捉賽），跟住獲亞洲單車聯會表揚，好似帶領亞洲運動員作出突破，真係好開心。」若能代表亞洲衝擊奧運獎牌，必屬車手生涯另一神迹：「如果冇前人做呢樣嘢，個個都話冇可能，以前拎亞洲冠軍都難，依家逐一突破，有信心衝擊更大目標。」

關注退役問題或做教練

香港運動員結束職業生涯後，少數可轉做體育相關工作，他亦關注運動員前途問題，眼見很多運動員夭折或「不得善終」，甚至於30歲前後的黃金期離場，他更想親身「走完一圈」：「有人因工作走，有因家人唔鍾意離開，我想行完整個圈，做個宣傳活動嘅人，畀人睇香港運動發展。」

言下之意，有心執起教鞭？「依家會諗呢啲問題，但唔會諗得太深入。如果有人畀機會，希望有試用期，若然要求好高，就會好大壓力，唔係唔想接受挑戰，但從事某樣工作都要畀機會學習，如果做教練更需較長時間。」