中國欲圓世盃夢最快2030
中國欲圓世盃夢最快2030
卡塔爾奪得2022年世界盃主辦權，基於國際足協（FIFA）規例，同洲份嘅國家唔可以連續舉辦世界盃，意味着中國又要再等等。雖然中國足協副主席韋迪表示會繼續努力，將申辦2030年世界盃，但到時就要同英格蘭爭過，絕對唔容易！
要同英格蘭拗手瓜
雖然申辦2026世盃嘅計劃未能達成，但韋迪嘅信心並冇動搖，佢喺祝賀卡塔爾嘅同時強調會捲土重來：「身為中國足球界嘅一分子，梗係希望世盃喺度舉行，中國係有實力嘅大國，舉辦世盃只係遲早問題，唯一要考慮嘅就係申辦邊屆先至最合適。」
得知中國有意申辦2030世盃之後，日本足協副會長大仁邦彌向外國通訊社表示擔心唔夠爭，但查實除咗中國之外，剛剛申辦衰咗嘅英格蘭亦會加入戰團。英國博彩公司William Hill尋日開盤，英格蘭成功申辦2030世盃嘅賠率係11倍，中國想達成世盃夢仲要過埋英格蘭呢關。