連拿屙蛋紅軍和波提早晉級

褪色英超勁旅利物浦昨晨於歐霸盃K組分組賽作客次席嘅布加勒斯特星隊，雖只踢成1:1，但仍足以提早確定進身32強。

代隊長稱被激光射眼

季前已經表明唔會重視歐霸盃嘅領隊鶴臣，呢場波派出大量副選及年輕球員上陣。紅軍今仗有個唔錯開局，19分鐘米蘭祖雲奴域就接應巴布傳中頭槌頂入先開紀錄，但換邊後門將連拿屙蛋被扳平1:1完場，但好在同組另一場波，拿玻里同烏德勒支踢成3:3，間接令利物浦提早以首名晉級32強。

由於正副隊長謝拉特同加歷查雙雙因傷缺陣，連拿今仗獲授以隊長臂章，點知就即刻出現蝦碌場面，喺接一個冇力嘅頭槌時竟屙蛋漏入，都算老貓燒鬚喇！賽後佢接受訪問話，喺比賽早段曾經畀球迷用激光射眼，但就指今場嗰低級失誤係冇得賴，完全係自己嘅錯。雖然連拿比賽時畀唔到信心隊友，但賽後勇於承擔責任，確係有幾分隊長風範喎。

至於歐霸盃另外幾組賽事之中，維拉利爾、巴黎聖日耳門、基輔戴拿模同比錫達斯同樣贏波提早晉級，而布拉格斯巴達雖然作客賽和巴勒莫，亦都提早出線。