勝利者施丹帶挈卡塔爾成功

世界盃主辦國塵埃落定，其中2022年一屆主辦權由卡塔爾奪得，將係世盃首次喺中東舉行。今次卡塔爾嘅成功，或多或少要歸功於特邀形象大使施丹，呢位法國球王更高呼：「我係勝利者！」

曾助法國奪歐國盃主辦權

繼今年5月成功以大使身份，協助祖國奪得2016年歐洲國家盃主辦權後，施丹喺前晚嘅世盃主辦權「再勝一仗」，認真當旺。佢接受訪問時話，呢個唔止係卡塔爾嘅勝利，仲係成個阿拉伯世界嘅勝利，並認為國際足協執委呢次決定，證明咗足球係屬於全世界每一個人。

當講到自己今年先後成功申辦歐國盃同世界盃，呢名3屆世界足球先生就顯得意氣風發：「冇錯我已經連贏兩次，不過大家都知道，我一直都係位勝利者！」施丹同時表示對西葡兩國失落2018主辦權感到傷心，咁唔知佢遲啲會唔會幫埋佢哋做大使，喺爭取主辦權度「大演帽子戲法」呢？

卡塔爾3880億辦世盃

‧招聘近千名歐美體育管理精英，又邀請施丹同巴迪斯圖達等巨星出任申辦大使，申辦總支出高達6.47億美元（約50億港元）。

‧波斯灣首個世界盃，亦係世盃史上國家土地面積最細兼人口最少嘅東道主。

‧土地面積為11,437平方公里，12個球場相隔唔遠，球迷一日可以睇多過一場波。

‧主辦世盃嘅預算係500億美元（約3,880億港元），包括興建12個有冷氣嘅球場。