英格蘭慘敗怨畀人出賣

2018及2022年世盃申辦戰圓滿結束，本來成王敗寇冇乜好再爭論，但兩個落敗國英格蘭同美國，事後齊齊發表不滿，英格蘭怨畀幾個國家代表出賣，又暗示背後有黑幕內定俄羅斯攞2018主辦權，美國更直指國際足協（FIFA）做咗錯誤決定。究竟係真有內情出錯？定係大國輸打贏要發爛渣，就留畀大家判斷。

喺2018年世盃申辦權投票戰中，英格蘭首輪只獲得2票提早出局，當中一票更係來自「三獅兵團」自己，其餘一票相信就係來自非洲足協會長哈亞圖，威廉王子同首相卡梅倫同樣對結果感到失望，卡梅倫更加嬲到話暫時冇打算去恭賀俄羅斯總理普京，至於英格蘭申辦團主席安迪安臣亦極度不滿：「我原本預計至少會有6票，甚至係7、8票，我唔想開名，但的確係有人講咗大話。」

預計8票實得2票

據英國傳媒所講，國際足協副會長兼中北美洲主席華拿，曾經同威廉王子搭膊頭承諾會投英格蘭一票，華拿更喺會議上同威廉王子保證，亦曾私下同碧咸講過，來自加勒比海地區嘅3票都係撐英格蘭，但最終一票都唔見。另有報道指，俄羅斯申辦團行政總監蘇洛堅早喺公布結果前24小時，曾私下向英格蘭代表透露，已經取得足夠票數攞到申辦權，此舉自然惹嚟唔少內定結果揣測，前英格蘭國家隊領隊泰萊就要求國際足協徹查事件。至於傳媒則諷刺由俄羅斯主辦世盃，將牽涉埋黑手黨同種族歧視。

對於英格蘭嘅不滿同指控，俄羅斯一於好少理，總統梅德韋傑夫即時喺Twitter寫上「勝利」，至於喺莫斯科，雖然氣溫係攝氏零下20度，大部分人都選擇喺室內慶祝，但亦有小部分Fans冒住大雪上街狂歡。

美總統奧巴馬插錯誤決定

另邊廂，卡塔爾最終擊敗美國同南韓等對手取得2022世盃主辦權，本來志在必得嘅美國總統奧巴馬事後就有失風度咁話：「我認為呢個係錯誤決定！」有美國籍嘅國際足協委員更炮轟卡塔爾唔可以幫全國裝冷氣，根本唔係理想主辦世盃國家，但畀卡塔爾代表反擊94年美國世盃亦曾喺炎熱天氣進行，引發罵戰。