卡卡1月回歸AC打救足球事業？

雖然有消息話卡卡堅稱暫時無意重投AC米蘭，寧願留效皇家馬德里證明自己，不過喺周日一則來自AC班主貝魯斯干尼旗下嘅意大利電視網絡Mediaset報道，AC已經同皇馬展開商討，卡卡絕對有望喺明年一月以先借後買形式回歸AC！

據Mediaset報道，AC基本上同皇馬達成咗初步協議，嚟到西甲一直狀態麻麻嘅卡卡，會喺明年一月期間以借用形式回歸AC効力半年，爭取重拾佳態，然後直到季尾再作檢討，睇睇AC係咪買斷呢位巴西球星。09年6月以6,500萬歐元身價加盟皇馬嘅卡卡，今次一旦回歸，皇馬肯定要做蝕本生意，不過AC能否搵到着數，亦言之尚早，睇番另一AC名將舒夫真高由車路士回歸後，亦難重上高峰，唔排除卡卡會係另一個翻版。

Twitter賀巴西排球隊稱霸

儘管轉會傳聞滿天飛，但卡卡似乎心情唔差，尋日睇見巴西男子排球隊喺2010年世界男排錦標賽決賽3:0擊敗古巴封王後，佢隨即喺Twitter恭賀呢支祖國球隊。值得一提，喺卡卡Twitter上嘅相片，係個可愛金毛小朋友，佢仲向一眾關注佢嘅網友證實，呢個金毛仔原來就係佢本人。